SAMUKELISIWE MBONAMBI
UMasipala weTheku uthole uxhaso kuhulumeni kazwelonke ukuze kusheshiswe ukulungiswa kwengqalasizinda eyalinyazwa yizikhukhula ngonyaka odlule. Lokhu kuvezwe yiMeya yeTheku ngesikhathi amathimba kaMasipala eholwa yizikhulu eziphezulu evakashele izindawo ezahlukene eHenry Bona Zone njengengxenye yohlelo lwe-Operation Sukuma Sakhe (OSS).
Inhloso ye-OSS ukulandelela, ukuhlola kanye nokunikeza impendulo mayelana nenqubekelaphambili yezinhlelo zokulethwa kwezinsiza emiphakathini.
“Sithole imali kuhulumeni kazwelonke yokulungisa ingqalasizinda eyonakele. Sithole u-R1.2 billion wokulungisa ingqalasizinda yezobunjiniyela, u-R228 million wamanzi nokuthuthwa kwendle no-R94 million wezindlu, umsebenzi wenziwa e-Henry Bona Zone okwamanje ehlanganisa uwadi 13, 14, 15 no-16,” kuchaza uMeya uKaunda.
Njengengxenye yokuvakasha kokubheka, iMeya ivakashele umtholampilo waKwaNdengezi osebenza amahora angama-24 ngosuku. iPhini likaSihlalo weKomidi lezezimali uKhansela Bheki Mgwengwe uvakashele ehholo lomphakathi laseLuganda elisanda kuqedwa. Uthe kuzokwakhiwa umtholampilo eduze kwehholo. Ibamba lePhini leMenenja yeDolobha ophikweni lwezokuHlaliswa kwaBantu neNgqalasizinda uMaxwell Mthembu uthe labo abaxhume ugesi ngokungemthetho bayakhuthazwa ukuthi bafake izicelo zohlelo luka-80/20. Lokhu kusho ukuthi bazokhokha u-20% wemali abayikweleta iMasipala njalo uma bethenga amathokheni kagesi wekhadi
