IMeya yeTheku uKhansela Mxolisi Kaunda ivule isikhungo okuzohlomula kusona umphakathi njengoba sizothuthukisa amakhono, lesi sikhungo sivulwe ngokusemthethweni ngomhla ka-19 Ephreli. Inhloso yalesi sikhungo sokuqeqesha iWestown Training Centre, wukugqugquzela umphakathi waseShongweni ukuba ubambe iqhaza emathubeni azovela ohlelweni lwentuthuko lwaseWestown. Isikhungo sisungulwe yiWestown Foundation ngokubambisana neStefanutti Stocks Academy.
IMeya uKaunda iphawula ngokuvulwa kwalesi sikhungo ithe:“Sikwamukela ngezandla ezimhlophe ukuvulwa kwalesi sikhungo njengoba kuhambisana nohlelo lukahulumeni lokuthuthukisa amakhono. Asikungabazi ukuthi abazoqeqeshwa lapha bazohlonyiswa ngamakhono adingekayo embonini yemisebenzi. Lokhu kuzoba nomthelela omkhulu ekunciphiseni ukwentuleka kwemisebenzi kuleli.”
IStefanutti Stocks Academy ihlinzeka ngezinhlelo zokuqeqesha ezigunyazwe yiCETA zokushayela izimoto nemishini emikhulu yezokwakha, uhlelo olugunyaziwe lokufundela umsebenzi, iphinde iqeqeshele amakhono akhethekile.
IWestown Foundation neStefanutti Stocks Academy banezinhlelo zokuthuthukisa amakhono nokufunda abahlose ngazo ukusiza imiphakathi ikwazi ukuzimela futhi ithole amathuba avela ezindaweni eziseduze nakude.
Eminyakeni emibili ezayo lesi sikhungo sokuqeqesha sizohlinzeka amathuba okuthuthukiswa kwamakhono ngokuthi siqeqeshe abantu abawu-15 ohlelweni ngalunye ukuze bathole ulwazi, amava omsebenzi, benyuse namazinga okuthola amathuba omsebenzi. Abantu ababalelwa ku-500 bazohlonyiswa ngamakhono afanele okuthola umsebenzi emkhakheni wezokwakha esifundazweni, abanye babo bazoba seWestown.
