OWAMI THABETHE
Isikole iMashiyamahle High eNdwedwe kanye neLungisisa Indlela Village (LIV), okuyikhaya lezintandane eVerulam, bathole iminikelo ebewusizo olukhulu ngoMsobuluko mhla zingu 19 Agasti..
IPhini likaNgqongqoshe wezemiSebenzi yoMphakathi neNgqalasizinda uMnuz Sihle Zikalala nezikhulu eziphezulu zeMsinsi Holdings banikele ngomfaniswano wesikole, amajezi ebhola lombhoxo, izitsha kanye nezihlalo ezingaphezu kuka-400 namatafula angu-50.
I-LIV inezingane ezingaba ngu-150. Isikole samabanga aphezulu iMashiyamahle eNdwedwe yisona esigcwele abafundi abangu-1 608, kanti ikilasi lika-matric lilodwa linabafundi abangu-206.
UZikalala uthe banikele ngomfaniswano nezinsiza zemidlalo kanti iminikelo izosiza ekusimamiseni uhlelo lokudla(feeding scheme) kwesikole njengoba sisendaweni ehlwempu.
“Banikezwe izinto ze-rugby sports kits ukuze nabo bawuthande lo mdlalo. Ukunikela ngomfaniswano wesikole kuzosiza ikakhulukazi kubafundi abaswele okufanele baye esikoleni behloniphekile nabo”, kuchaza uZikalala.
Uthishanhloko uMnuz Bhekhaya Lawrence Ngwane ucele ukuthi kwandiswe amagumbi okufundela ukuze kuqedwe ukuminyana. Uphinde wacela usizo ngabafundi abangaphezu kuka-200 abangenazo izitifiketi zokuzalwa ngenxa yezizathu ezahlukene.
Izikhulu ziphinde zanikezela ngezinsizakusebenza ehholo lomphakathi iSonkombo ukuze libasize basebenzise le ndawo ngendlela efanele. UZikalala uthe lolu hlelo luwukuqhubeka kwezinhlelo zentuthuko kule miphakathi eswele abayisekayo.
UZikalala uphinde wathi ezinye izindawo zizohlomula ngoxhaso ngaphakathi nangaphandle kwesifundazwe.
