SAMUKELISIWE MBONAMBI
UMasipala weTheku uhlinzeke ngezinsiza zokwakha emindenini ebalelwa ku-500 esale dengwane ngemuva kokusha kwemijondolo yaseDakota eSiphingo ngomhla ka-15 Ephreli. Cishe abantu abayinkulungwane bashelwe yizindlu zabo nempahla eshe yangqongqa emlilweni.
Izakhamizi ezithintekile zihlaliswe ezindaweni zesikhashana eduze kwaseDakota Beach ngenkathi kusakhucululwa le ndawo. Ithimba loNgqongqoshe lihlangene nobuholi bedolobha, liholwa uNgqongqoshe wezokuHlaliswa kwaBantu uMmamoloko Kubayi, livakashele le mijondolo ukuze lixoxisane nezakhamizi ezithintekile mayelana nezisombululo zesikhathi eside zezinkinga izakhamizi ezibhekene nazo.
Izakhamizi zihlinzekwe ngosizo lokwenzelwa omazisi uMnyango wezaseKhaya, ukunakekelwa ngokwezempilo nosizo lwezenhlalakahle nengqondo, nomfaniswano wesikole wabafundi njengengxenye yezinhlelo zokungenelela.
USomlomo woMkhandlu iKhansela uThabani Nyawose uthe ukuhlinzeka izakhamizi ngosizo oluphuthumayo kuzosiza ukwehlisa ukukhungatheka emoyeni nasenyameni kwizakhamizi ngenxa yalenhlekelele futhi izakhamizi zizophinde zikwazi ukuqala zakhe kabusha impilo yazo.
“Ukulethwa kwempahla yokwakha kuzosiza izakhamizi ezithintekile ukuthi zakhe kabusha amakhaya azo nezindlela zokuziphilisa. Sizokwenza konke okudingekayo ukwakha kabusha amakhaya aphephile futhi sakhe indlela yokuziphilisa njengesixazululo sesikhathi eside,” kusho iKhansela uNyawose. Njengengxenye yezixazululo zesikhathi eside, kunezinhlelo zokuthuthela izakhamizi endaweni ehlonziwe eMkhomazi, engekude nalapho zihlala khona
njengamanje. Lena kuzoba yindawo ephephile nehloniphekile abangahlala kuyo.
