ZETHU PHOSWA
Osanda kuqokelwa kwesobuNdunakulu kaZulu uMntwana uThulasizwe Buthelezi, wethule ngokusemthethweni umhlahlandlela
nenqubomgomo yokusebenza kwehhovisi
lakhe, esithangamini nabezindaba kwelinye lama hhotela agudle ulwandle eThekwini.
Ethula inkulumo yakhe uMntwana uButhelezi kulesi sithangami uchaze indlela ihhovisi lakhe elizosebenza ngayo, lokhu okuyizinkomba zokuthi nakuba kunezivunguvungu mayelana nokuqokwa kwakhe, kulesikhundla sobuNdunankulu kaZulu, kodwa yena uyayibona indlela ebheke phambili.
“ISilo esibusayo uMisuzulu kaZwelithi, sesikhiphe
izinhlelo zokusebenza kwehhovisi likaNdunankulu
kaZulu. Kanti siphinde sabalula ukuthi ukuqokwa
kukaNdunankulu kaZulu kubonakala kuzodala
uzinzo, nokubambisana eNdlunkulu kaZulu
nasesizweni sonkana,” kubeka uMntwana Buthelezi.
Uphinde waveza ukuthi iSilo esibusayo
sikucacisile ukuthi unyaka ka-2024, siwuthatha
njengonyaka wezithelo, zokuvuselela intshisekelo
kaZulu kanye nesithunzi sikaZulu.
“Imisebenzi esimemezelwe yiSilo uMisuzulu
kaZwelithini, ezosingathwa ihhovisi
likaNdunankulu kaZulu, okubalwa owekwembulwa
kwetshe leSilo esibuzile ngonyaka ofile mhla li-12 Mashi kulo nyaka. Mhla
zingama-27 kuEphreli kuvuselelwe itshe leLembe.
Kuzokwenziwa inkonzo kalowo
owayenguNdunankulu kaZulu uDkt Mangosuthu
Buthelezi, okunguyena okhonze isikhathi eside
kulesi sikhundla, njengoba ekhonze kwiZilo
ezintathu ,” kubeka uMntwana
Sokalisa.
Ngesikhathi ebize lesi sithangami
bekunokuqagela, kokuthi kungenzeka ukuthi
uzokwesula kulesi sikhundla, njengoba imikhonto
yamazwi ize njengemvula, ngemuva kokuqokwa
kwakhe, kulandela imvunge eqhamuke kwabanye
baseNdlunkulu kaZulu, emndenini kalowo obeNdunankulu kaZulu osekhotheme nakwezinye izinhlaka.
Kuzokhumbuleka ukuthi uMntwana Thulasizwe
Buthelezi usengumacekeceke kulesi sikhundla,
njengoba eqokwe iSilo Samabandla uMisuzulu
kaZwelithini, ngesikhathi kukhunjulwa impi
yaseSandlwane eyabe iphakathi kukaZulu
namaNgisi mhla ziyi-27 kuMasingana.
Kanti futhi ukuqokwa kwakhe kuqede ukuqagela obekukhona njengoba kube nezinsolo zokuthi kungase kuqokwe lowo oyindodana yoMntwana waKwaphindangene,
uMntwana uZuzifa Buthelezi.
Ukweseka umbono waso Isilo sokuqoka
uNdunankulu kaZulu sithe, uButhelezi usebenze
kahle kakhulu neSilo uGoodwill kaBhekuzulu
ngesikhathi esaphila.
