ZETHU PHOSWA
IQEMBU lepolitiki i-Inkatha Freedom Party (IFP), yethule amaphuzu ayi-13 azosebenzela kuyo ukushintsha iNingizimu Afrika, uma inqoba ukhetho mhla ziyi-29 kuNhlaba (May), eNkundleni yezemidlalo iMoses Mabhida, eThekwini, ngomhlaka 10 Mashi.
Lawa maphuzu athulwe phambi kwezinkumbi zabantu abebethamele lomcimbi wokwethulwa komhlahlandlela waleli qembu ezosebenza ngawo, ukwakhakha kabusha iNingizim Afrika, abayichaza njengokuthi manje kayikho ezandleni eziphephile.
Le nhlangano yenze njengawo wonke amaqembu, ngenhloso yokuheha abavoti ukuthi baqome ukuvotela yona.
UMengameli we-IFP uMnu Velonkosini Hlabisa, ethula amaphuzu ayishumi nantathu (13 point plan), ufolose ngokuqeda ukucimasakonga ugesi, akuchaze njengento ebulala umnotho futhi enegalelo lokuncipha kwamathuba emisebenzi.
“Sizokuyivikela Ingonyama Trust, ukuze igcine isezandleni ezifanele ukuyisebenzisa. Siyazibophezela ukuthi ukwakha iNingizimu Afrika entsha engenabo ubugebengu, engenako ukuhlunyezwa kwabesifazane nezingane, nokuqinisekisa ukuthi siqeda inkohlakalo,” kubeka uMengameli waleli qembu uMnu Velenkosini Hlabisa.
Uphinde wathembisa ukwakha amathuba emisebenzi nokuphucula imiphakathi ngokusebenzisana nabaholi bendabuko.
“Sizokwakha amathuba emisebenzi. Sizobhekelela ezempilo, siqinisekise nokuthi abantu abadala bathola imali yempesheni ezobanika isithunzi, sibhekelele nesibonelelo sezingane. Okunye esizokwenza ukunikeza imfundo mahhala. Sizoqinisekisa ukuthi ezokuphepha ziqinile,” esho kanje
Isisekelo se-IFP
Inkatha Fredoom Party (IFP) inhlangano yezepolitiki esungulwe ngonyaka mhla ziyi-21 kuMbasa (Aphreli) ngonyaka we-1975, isungulwa Dkt Mangosuthu Buthelezi ngokuhlanganyela nabantu abawumnsinsi wokuzimilela eNingizimu Afrika futhi ababezimisele ngokwenza uguquko empilweni zabantu.
Le nhlangano ikwazile ukuba ngeyesine ukuthatha indawo ephalamende, kanti iyinhlangano engunamba 3, ekubeni yinhlangano yezepoliti ephikisayo, njengoba ilandela i-Economic Freedom Fight (EFF),kanti ilandelwa ngemuva yiqembu lezepolitiki i-Freedom Front Plus.
I-IFP inezihlalo eziyi-14 ephalamende, ilandela i-EFF enezihlalo eziyi-44, yona ilandelwa i-Freedom Front Plus enezihlalo eziyi-10.
I-IFP phambilini ibibizwa nge-Inkatha Yenkululeko Yesizwe. Yakhelwa ekuhlonipheni amasiko nobukhosi bendabuko.
