SHEILA MHLONGO
Luzobe luqashwe ngelokhozi ukhetho luka 2024, KwaZulu-Natali.Lokhu kuhlaluke ngesikhathi kade kuhlangene abamaqembu ehlukene ezepolitiki (Multi-Party Olitical Party Intervention Committee)esifundeni iZululand KwaNongoma ngoLwesihlanu lomhlaka 22 Mashi 2024.
Lomhlangano wokudingida ngohlelo lokuqapha ukuphepha oluzosebenza ngesikhathi kuqhubeka ukhetho, beliholwa uSihlalo walo uNgqongqoshe wezokuThutha kanye nezokuXhumanisa uMphakathi, KwaZulu-Natali uMnu Sipho Hlomuka ehambisana noMphathi Jikelele we Independent Electoral Commission (IEC) uSy Mamabolo.
Ukuhlala kwalelikomidi ebelihlanganise abaholi bamaqembu ezepolitiki ehlukene belumayelana nokucaba umhlahlandlela wohlelo lokuqinisekisa ukuthi kuba nokuthula kanye nokubekezelelana phakathi kwamaqembu ezepolitiki lapha KwaZulu-Natali, njengoba kulungiselelwa ukhetho oluzoba ngomhlaka 29 Meyi 2024.
Abebemele amaqembu ezepolitiki bazibophezele ekwesekeni ukhetho olukhululekile olunokuthula. UGeneral Nhlanhla Mkhwanazi onguKhomishana woMbutho wezamaPhoyisa KwaZulu-Natali ehambisana nePhini lika Khomishana uMajor General Phumelele Makhoba, bazibophezele ekutheni bewumbutho wezamaPhoyisa bazokwenza konke okusemandleni ukuthi umthetho uyagcinwa ngesikhathi kuqhubeka ukhetho ngenhloso yokuvikela amalungelo alabo abafuna ukuvota ukuthi bangaphazanyiswa, kuthi labo abephula umthetho babhekane nengalo yomthetho.
Phakathi kwezihambeli zalomhlangano kube iPhini leMeya yaKwaNongoma ukhansela Nkosi, uSihlalo weNdlu yabaHoli beNdabuko kanye nomholi wama Khoisan,Inkosi Shinga, kanye nezikhulu zikahulumeni.
