ZETHU PHOSWA
KUZOWATHWALISA kanzima amaqembu ezepolitiki KwaZulu-Natal , ukuhlangana kwenhlangano i-Economic Freedom Fighters (EFF) nenhlangano yabahlali basemjondolo.
Lokhu kuvele ngesikhathi kunombuthano waBahlali basemjondolo, eNkanini ezinkundleni zemidlalo e-Mayville eThekwini ngeSonto.
UMnuz Sbu Zikode okhulumele umbutho wabahlali basemjondolo , uthi lokhu baqale ukucutshungulwa abahlali basemjondolo, okuze kwaphunywa nesinqumo sokuhlanganyela ne-EFF mhla ziyi-7 ku-April kulo nyaka, kulolu khetho oluzokuba mhla ziyi-29 May 2024.
“Into esiyenzile enhle wukuthi kasizange silalele imihlahlandlela yamaqembu ezepolitiki, kodwa senze owethu usomqulu, okuyiwo esisebenzele phezu kwawo,” kubeka uMnu Zikode.
Uthi kusomqulu wabo babe namaphuzu ayi-20, kodwa ebiseqhulwini ukubuyiselwa komhlaba kubantu,
“Into eyenze sanquma ukumbatha ne-EFF kulo nyaka wukuthi bakwazile ukuhlangabezana nomhlahlandlela wethu. Silwela ukubuyisa isithunzi kubantu ngokubuyisela umhlaba wabo ezandleni zabo. Inhloso yethu ukukhipha ANC emandleni njengoba ingasazigqiziqakala izimfuno nezidingo zabantu,” esho kanje.
Uthi inhloso yalo mbutho wabahlali basemjondolo ukubuyisa isithunzi somuntu omnyama ngokuthuthukisa inhlalo yabo, bathole izindlu ezinesithunzi.
Lenhlangano isungulwe ngonyaka wezi-2006, ngesikhathi kunokhetho lo hulumeni basekhaya, lapho abathi uma umhlaba ungekho kubantu, abantu bengenazo izindlu angeke bavote, okuyilapho abaqala khona ukugodla ivoti
Ngonyaka we-2014 bahlangana ne-DA ukuketula i-ANC ngoba ingesenalo ugqozi ngabantu, nango-2019 bagcine bevote ne-DA .
