SHEILA MHLONGO
Isilo Samabandla uMisuzulu KaZwelithini wamukelwe ngezandla ezifudumele nguNdunankulu waKwaZulu-Natal uThamsanqa Ntuli emcimbini wokugcotshwa kweNkosi uMzamo Buthelezi eMbongombongweni, Ophongolo, ngoLwesihlanu lomhlaka 26 Julayi 2024.
Inkosi uMzamo Buthelezi uyiPhini likaMengameli we-Inkatha Freedom Party (IFP) aphinde abe uNgqongqoshe wezeMisebenzi yoMphakathi kuzwelonke.
Kanti umcimbi wokugcotshwa kukaButhelezi, ubuthanyelwe izinkumbi zabantu, ubuholi obuphezulu kuhulumeni wesifundazwe kanye nakuzwelonke, uNdunankulu waKwaZulu-Natali uMnu Thamsanqa Ntuli, uNgqongqoshe wezeMidlalo, ezobuCiko kanye namaSiko uMntomuhle Khawula, owezokuThuthukiswa koMnotho nezokuVakasha Nokongiwa KweMvelo uMfu. Musa Zondi, owezeMisebenzi YoMphakathi neNgqalasizinda uLucas Meyer kanye noNgqongqoshe wezokuBusa ngokuBambisana kanye neziNdaba zoMdabu kuzwelonke uMnu Velenkosini Hlabisa.
Umcimbi uvulwe ukufika kwamaButho kaZulu abevunule econsa kwabe sekulandela ukufika kweSilo uMisizulu kaZwelithini obezokwenza umsebenzi omkhulu wokugcoba Inkosi yakwaButhelezi, njengendlela yokuhlonipha usiko lakwaZulu, kuphinde kubeke uphawu lokuqinisa isizwe samaZulu ngaphansi kobuholi baso Isilo.
Ethula inkulumo uNdunankulu waKwaZulu-Natali uMnu Thami Ntuli, uthe ukwethulwa kweNkosi yesizwe kusho ukuvunywa kwayo ngabaphilayo nalabo abangasekho. Ivunywe yisiko, yavunywa yiSILO iphinde izovunywa zinkumbi zabantu abethamele umcimbi.
“Izintaba namathafa asoPhongolo kufihle imilando eyahlukene. Omunye wayo ngumlando wesizwe sakwaButhelezi. Yize SILO esikhulu nani Makhosi aseNdlunkulu ngiqonda ukuthi okwanamuhla wukugcwalisa njengoba onke amasiko okuthela amanzi esaphothulwa, ngiyafisa ukuliqopha lolu suku njengalelo olumqoka.”kusho uNdunankulu uNtuli.
UNgqongqoshe wezokuBusa ngokuBambisana kanye neziNdaba zoMdabu kuzwelonke uMhlonishwa uVelenkosini Hlabisa uhlalalisele Inkosi yakaButhelezi ngokugcotshwa kwayo wathi uyabethemba kakhulu ubuholi bayo.
