OWAMI THABETHE
Owayengumsakazi woKhozi FM osengundabuzekwayo, uNgizwe Mchunu, usefakwe ohlwini lwabangafanele ukuhamba ngebhanoyi lenkampani yakwaFlySafair.
Kwi-video efakwe ezinkundleni zokuxhumana, uMchunu obevutha engabaselwe uthe inkampani yezindiza imthumelele incwadi imazisa ngokumiswa kwakhe ukugibela indiza yalenkampani.
UMchunu nethimba abehamba nalo basuse umsindo endizeni i-FlySafair i-FA196 ebisuka eKing Shaka International Airport eThekwini ilibangise eCape Town International Airport ngoMgqibelo,mhla zingu 24 ku Agasti.
Ngemuva kokuthola incwadi yendiza, uMchunu wacela ukuhlangana nomphathi wale nkampani wacela uxolo.
Uchaze isenzo sakhe endizeni njengendlela yakhe yokuhlonipha uKing Shaka, okuqanjwe ngaye isikhumulo sezindiza saseThekwini.
Ebuzwa ngemininingwane yencwadi yokumiswa kukaMchunu, isikhulu sezokukhangisa kwaFlySafair, uKirby Gordon, uthe ngenxa yokuhlonipha ukugcinwa kwemfihlo kwamakhasimende, akakwazanga ukudalula isimo sikaMchunu maqondana nohlu oluthi “No-Fly List”
“Indlela yokunquma ivamise ukubandakanya izinto ezinjenganoma yiziphi izenzo zokukhwabanisa, izenzo noma izinsongo zodlame olubhekiswe kubasebenzi bethu noma ukwephulwa kwanoma yimiphi imithetho yezokundiza njengoba ibekwe yi-Civil Aviation Authority.
“Izibonelo zalokhu kungaba izinto ezinjengokubhema ugwayi ebhanoyini, ukuhlukumeza impahla yendiza, ukunganaki izimpawu zebhande lesihlalo noma ukwenqaba imiyalelo yelungu labasebenzi,” kusho uGordon.
Inkampani yakwa FlySafair ithe isazosibukisisa isixoliso sika Ngizwe.
