OWAMI THABETHE
UNgqongqoshe Wezasekhaya, uLeon Schreiber, umemezele ukuthi amahhovisi omnyango azosebenza amahora amahlanu ngeMigqibelo kuzo zonke izifundazwe, ukunikeza omazisi besikhashana, ukuqoqwa komazisi kanye nezinhlelo zokufaka izicelo kubafundi bakamatikuletsheni ukuze bakwazi ukubhala izivivinyo zabo zokugcina.
Lokhu kuza ngemuva kokuthi uNgqongqoshe wezeMfundo eyisiSekelo, uSiviwe Gwarube, ethe umnyango wakhe usukulungele ukuphatha izivivinyo zokugcina zeNational Senior Certificate (NSC) zekilasi lika-2024.
Ikilasi lika-Matric lika-2024 lihlelelwe ukubhala phansi izivivinyo zabo zokugcina eziqala ngo-Okthoba 21 ziphele ngoNovemba 27.
Babalelwa ku-732,448 abafundi abazobhala ngokugcwele ababhalisele izivivinyo ze-NSC, kanti bangu-136,195 abangabatoho ababhalisele izifundo ezahlukene kulo nyaka.
Ngemuva kwesimemezelo sikaGwarube sokuthi umnyango wakhe usukulungele ngokugcwele ukuphatha izivivinyo zokuphela konyaka, uSchreiber umemezele ukuthi uMnyango wakhe uzokwenza izinkonzo ezikhethekile ngoMgqibelo ukuze abafundi baka-matric, abangenawo omazisi, bathole ithuba lokufaka isicelo. .
USchreiber uthi izikhulu zoMnyango wezaseKhaya kuzo zonke izifundazwe ezingu-9 zizosebenza ngeMigqibelo kusukela ngoSepthemba 21 kuya ku-Okthoba 12, ukuze kuvunyelwe abafundi bakaGrade 12 ukuthi bafake izicelo zomazisi besikhashana, ukuqoqwa komazisi kanye nezicelo.
Uthe amahhovisi azovula iminyango yawo kusukela ngo-8 ekuseni kuze kushaye ihora lokuqala emini, abafundi bakamatikuletsheni nabafundi babekwe eqhulwini ngalesi sikhathi.
“Lolu hlelo kuhloswe ngalo ukuthi abafundi bakamatikuletsheni bakwazi ukubhala izivivinyo zabo okuyisinyathelo sokuqala sokufukula intsha kwezomnotho,” kusho uSchreiber.
