OWAMI THABETHE
IMeya kaMasipala weTheku, uKhansela Cyril Xaba, uthakazele ukwethulwa kohlelo lwePilgrim X Housing Project nguNgqongqoshe wezokuHlaliswa kwaBantu, uMmamoloko Kubayi, kanye noNgqongqoshe waKwaZulu-Natali, uSiboniso Duma, eSiphingo mhlaka 31 kuOkthoba.
Le phrojekthi izothuthukisa iPilgrim X Informal Settlement, ilethe izindlu ezingu-404 ezifakelwe amanzi alinganiselwe, ugesi, ukukhucululwa kwendle, kanye nezinsiza ezibalulekile zenhlalo ezifana namapaki, izikhungo zokukhulisa izingane zisencane, nezindawo zokukhulekela.
“Siyajabula ukuthi lo msebenzi usuyaqhubeka, njengoba kulindeleke ukuthi ukwakhiwa kuqale esontweni lesibili likaJanuwari 2025. Usuku okulindeleke ukuthi luphothulwe ngoNovemba 2028. Okunye okubalulekile ukuqaphela ukuthi, lokhu kuthuthukiswa kubekwe endaweni ekahle eduze kwamathuba omnotho, izikole, izikhungo zezempilo, nezinye izinsiza zomphakathi ezibalulekile, ukubhekana nokungalingani kwezindawo okwadala umonakalo wobandlululo,” kusho iMeya uXaba.
UNgqongqoshe Kubayi uthe lo msebenzi uxhaswe yi-Informal Settlements Upgrading Partnership Grant (ISUPG) kanye neHuman Settlements Development Grant (HSDG), umzamo wokusebenzisana phakathi kweminyango kazwelonke neyesifundazwe yezokuHlaliswa kwaBantu kanye noMasipala weTheku.
