OWAMI THABETHE
UMnyango wezemiSebenzi yoMphakathi KwaZulu-Natali neNgqalasizinda (DPWI) uthukuthele emva kokuthi inkontileka yokwakha okubikwa ukuthi yathatha u-R10 million ngaphambi kokuba isebenze kodwa yahluleka ukuqala umsebenzi.
UNgqongqoshe we-DPWI, uMartin Meyer, udalule ukuthi uMnyango uthungatha iThemane Construction kulandela ukunyamalala kwabo ngaphambi kokuba kwenziwe noma yimuphi umsebenzi njengengxenye yohlelo lokwakha olukhulu luka-R56 million.
Lo msebenzi ube nezinkinga eziningi ngemuva kokuthi usonkontileka omkhulu eshiye phansi izibopho zabo, okusolwa ukuthi kungenxa yokusatshiswa okwabangelwa ‘yiMafia’ enedumela elibi.
Isimemezelo sikaMeyer sigcizelele ukuthi uMnyango uzibophezele ekuthatheni izinyathelo kosonkontileka abashiye izibopho zabo ngemuva kokuthola imali.
“Sinqume ukuthi ngeke sibazwele osonkontileka abasebenzisa budedengu izimali zomphakathi,” kusho uMeyer.
Imibiko iveza ukuthi ukungabi bikho kobuhlakani bezimali ekuthathweni kwezinqumo kube nomthelela kulesi simo, njengoba esinye isikhulu somnyango sidalule ukuthi usonkontileka wanikezwa inkokhelo yangaphambili ngezizathu ezingathi shu ngaphandle kokuhlolisisa kahle.
Ngokombiko wephephandaba iSunday World, umqondisi wezeMisebenzi yoMphakathi kanye neNgqalasizinda, uSimphiwe Blose, ukuqinisekisile ukuthi iThemane Construction ithole inkokhelo engaphezulu kuka-R9.5 million, okuyisinqumo esidale ukuthi kubekwe icala lobudedengu emnyangweni.
“Nakuba sifuna ukusiza osonkontileka abancane, ikakhulukazi ngemali yokukhokhela izindleko zokuqala, kuhlale kudumaza uma bethatha isinqumo sokungathembeki,” kwenaba uBlose.
