Gugu Mdlalose
Livuliwe iTheku futhi lisalokhu liyindawo yokuzijabulisa ehamba phambili e-Afrika. Lokhu
kugcizelelwe yiMeya yeTheku, uKhansela Cyril Xaba, ngesikhathi yethula uhlelo
lukaMasipala lokusingathwa kwamaholidi kaKhisimusi eShaka Marine World.
Njengoba izivakashi ezizochitha amaholidi azo seziqalile ukutheleka eThekwini, uMasipala
usuhlele uchungechunge lwemicimbi nezinye izinhlelo zokuzijabulisa ezihambisana
namabhishi awo ahlanzekile, izindawo zobumnandi zasebusuku, namagugu namasiko
aseThekwini anothile.
Njengengxenye yokuqinisekisa amaholidi aphephile izivakashi ezingasoze zawakhohlwa,
uMeya uXaba uthe amaPhoyisa kaMasipala asebenzisana nezinhlaka zomthetho
ezahlukahlukene okubalwa kuzo uphiko amaphoyisa eSouth African Police Service, iRoad
Traffic Inspectorate, nezinkampani zonogada ezizimele ukuze abomthetho bahlale
bebonakala beqaphile kuzo zonke izindawo zokuvakasha nezindawo esezihlonzwe
njengezizinda zobugebengu. Lokhu kusebenzisana okuphakathi kukaMasipala
nababambiqhaza abazimele bezokuvakasha kwesekwa yithimba iPresidential eThekwini
Working Group.
UMeya uCyril Xaba uthe ukuphepha emgwaqweni kuyingxenye ebalulekile yokuqinisekisa
amaholidi anokuthula nenjabulo.
“Amaphoyisa ethu azobhekana nabashayela bephuzile kanjalo nabaziphatha budedengu
emigwaqweni. Imikhankaso yokuqinisekisa ukugcinwa komthetho, okubalwa kuyo
nezivimbamgwaqo, izoqhutshwa kulo lonke iTheku ukuze kuliwe nazo zonke izinhlobo
zobugebengu. Ukungena kwezimoto kuzolawulwa emigwaqweni ethile eholela ebhishi.
Indawo esetshenziselwa ukupaka bese ugibela ibhasi nayo izobe ivuliwe. Le ndawo
imahhala futhi izithuthi zihamba njalo ngemizuzu ewu-30 ngesikhathi samaholidi,” usho
kanje.
Njengengxenye yokuqinisa ezokuphepha, kuzotshalwa amaPhoyisa kaMasipala amasha
asanda kuqeqeshwa awu-500 ukuze asize ekuqinisekiseni ukuthi amaphoyisa ahlale
ebonakala emigwaqweni nasemiphakathini. Lokhu kuza ngemuva kokuthi uMasipala usanda
kuthenga izimoto zamaPhoyisa kaMasipala ezingaphezu kuka-170.
UMeya uXaba uthe amanye amaphoyisa azobe esebenza egibele amahhashi
namabhayisikili ezindaweni ezahlukahlukene zokuvakasha, elekelelwe nangamakhamera e-
CCTV.
Mayelana nezokuphepha emabhishi, ukuze izingane zitholakale kalula, uMasipala
usuthenge amabhande afakwa engalweni awu-200 000 wagxumeka namatende
ayisikhombisa emabhishi ukuze kuhlaliswe kuwona izingane ezidukelene nabazali bazo.
Kuphinde kwahlelwa nendawo lezi zingane ezingalaliswa kuyona.
“Ngaphezu kwalokho, uMasipala usuyayiphothula nenqubo yokuqasha abasebenzi
bangamaholidi abawu-540 abazotshalwa ezindaweni ezahlukahlukene zokuvakasha. Lapha
kubalwa abacosha udoti abawu-135 nabazosiza izivakashi emabhishi ehlukahlukene abawu-
Kuzotshalwa nabasebenzi abasiza ezindaweni zokubhukuda abawu-105 ukuze basize
ukuqinisekisa ukuphepha kwababhukudayo,” kwengeza uMeya uXaba.
Uthe uMasipala uzoqhubeka nokuqapha uphinde uhlole izinga lokuhlanzeka kwamabhishi
masonto onke, waphinde wagcizelela ukuthi uMasipala unezindawo zokubhukuda
ezingaphezu kweziwu-40 ezindaweni ezahlukahlukene.
“Asikungabazi ukuthi isikhathi samaholidi kulo Disemba sizoba mnandi, futhi siqinisekisa
izivakashi zethu ukuthi ngaphandle kwamabhishi, sinenqwaba yezinye izindawo ezihehayo
eziseThekwini,” kuphetha uMeya uXaba.
Isimo sokuhlanzeka kwamanzi emabhishi singabhekwa ku- www.durban.gov.za/BeachStatus .
