Njengawo wonke amanye amadolobha aseNingizimu Afrika, neTheku nalo lisenkingeni yokwehla kwezinga lobuhle balo okubalwa kukho ukuncipha kwamathuba omnotho, amabhilidi angasanakekelwa, kanye nobugebengu.
Lesisimo siphinde sanezelwa nayisimo sezimvula ezinamandla ngonyaka ka2022 esashiya sicekele phansi ingqalasizinda ehlanganisa imigwaqo, olayini bokuxhumana kanye nogesi.
Ukubhekana nezinkinga zikamasipala uMengameli uCyril Ramaphosa wasungula iThimba lesigungu esingaphansi kwehhovisi lakhe (eThekwini Presidential Working Group) kusukela ngenyanga ka-Ephreli, ngenhloso yokunikeza isaphothi ezingeni likazwelonke kanye nasesifundazweni ukuze kwakhiwe kabusha umasipala.
Kusukela emuva kokusungulwa kwalelithimba seleseke imizamo yokwenza ngcono ukulethwa kwezidingo zomphakathi, ukuthenjwa emkhakheni wezamabhizinisi, kanye nokubeka uMasipala weTheku ezingeni elibuyisa ukwethenjwa kwezotshalomali kanye nokuheha ezokuvakasha.Kanti lelithimba lisebenza ngaphansi kwezingxenye ezintathu zikahulumeni okuhlanganisa abamele abezinkampani ezizimele kanye nabezinyunyana.
Ukuthuthukisa umkhakha wezamabhizinisi angabhalisiwe ngokusemthethweni
Ngonyaka ophelile enyangeni kaNovemba uMasipala weTheku umemezele uhlelo lokuthuthukisa umkhakha wezamabhizinisi angabhalisiwe emthethweni ngokulungisa kabusha izindawo okusebenzela kuwo lamabhizinisi.
Lama-Project ahlanganisa isamba sika -R10 million wokuvuselela kabusha indawo yase Dalton, Art and Craft Market, uR15 million wokuvuselela kabusha iMansel Road Market, R2.5 million wokuvuselela kabusha iTongaat Trader Market, uR4 million wokwenza ngcono iKwaMakhutha Business Hive kuWard 94 kanye no R4,3 million wokuthuthukisa iKlaarwater Business Hive ku Ward 17.
Nangonyaka ophelile iMansel Road Market yake yavakashelwa uNgqongqoshe wezamabhizinsi amancane uNksz. Stella Ndabeni-Abrahams.
“ UNgqongqoshe wanikezela ngemishini yokuthunga ebalelwa ku 100 kwathi labo abenza imisebenzi yokudayisa izinto zokudla bona banikezwa ama freezer, amabhodwe, gas stoves kanye nama-microwave.
Lokhu akwenzeki ndawo ezwenikazi laseAfrika lapho uhulumeni enikeza mahhala izimpahla kosomabhizinisi, lokhu kukhombisa ukuthi uhulumeni uyasinakekela.” Kusho uSihlalo we Mansel Road Market umboneni Qwabe ekhuluma ne SANews ngesikhathi kade ihambele kulendawo.
Oyisikhulu esiphezulu oPhikweni lwe Informal Economy kuMasipala weTheku uMichael Hlangu uthe iMansel Market ibike yaba isizinda esibhizi ngezimpelasonto lapho bekuphithizela amakhasimende abevela ezindaweni ezahlukene zaseNingizimu Afrika kanye nakumazwe angaphandle.
Izitolo zakulendawo zidayisa izinto ezifana nezingubo zokugqoka, ukudla, izigubhu, izinto zokwendlala imibhede, kanye nemvunulo. Babalelwa ku 180 abadayisi abasebenzela kulemakethe abazohlomula ngokuvuselelwa kwalendawo, okuhlanganisa ibhilidi elisha elinezindlu zangasese nokugeza,ugesi, amanzi kanye nendawo yokupaka.
“Sinezindawo ezingama Container ezibalelwa ku-180, amanye awo asegugile, sisohlelweni lokushintsha lama container abe izindlu ezakhiwe ngezitini nosimende. Sesiqashe osonkontileka ukuze baqale benze umsebenzi, abadayisi bazothuthelwa kwenye indawo kuyo lenyanga ukuze uqale umsebenzi wokwakha.
Ngesikhathi kwakhiwa kulindeleke ukuthi kuhlomule abantu ababalelwa ku-100 ngamathuba omsebenzi . Bonke abadayisi abakulendawo sebebhalisiwe kumasipala.
Iningi labo linawo amalayisense okuqhuba ibhizinisi abawavuselela minyaka yonke. Irenti yendawo yokudayisa ukudla ekhokhwayo ingu R664 ngenyanga, futhi basayinda isivumelwano sokuqasha (lease agreement).”Kuchaza uHlangu.
Ukwenza umehluko
UQwabe uthe minyaka yonke uMasipala uvame ukusingatha izinkomfa zamabhizinisi ukuchazela abadayisi mayelana nemisebenzi eyenziwayo ukwenza ngcono umnotho wabadayisi.
“Muningi umsebenzi osuwenziwe ukwenza ngcono umsebenzi wabadayisi. Ngesikhathi ivulwa lendawo ngonyaka ka 1996 ayengekho ama-container. Abantu babedayisela ezimotweni zabo ngaphansi kwemipheme, kwagcina ngokuthi kushintshelwe kuma container okuthe ngokuhamba kweminyaka aguga.
UMasipala uze ukuzosisiza singabadayisi njengoba sesakhelwa indawo entsha. Sesiyibonile ipulani futhi inhle. Sizokwazi ukuheha abavakashi uma sesinebhilidi elisha.” kusho uQwabe oweleke ngokuthi, iMansel Road Market iyindawo ekhiqiza imvunulo.
“Siwumbuso kaZulu lapho kutholakala khona izinto zokubonakalisa isiko lakwaZulu, Sinezinto ezingajwayelekile ongeke ukwazi ukuzithola kwezinye izindawo lapha eNingizimu Afrika.”Kuphetha uQwabe.SANews.gov.za
