SHEILA MHLONGO
Iqembu lebhola lezinyawo lamantombazane adlala ngaphansi kwe under 15 aphakamise igama lamantombazane njengoba kuyinyanga yabesifazane. Lokhu kuza emuva kokuthi leliqembu lidle umhlanganiso lathola umklomelo wenani lika R10,000 emqhudelwaneni we Under 15 Cup.
Lomqhudelwane webhola lezinyawo ubuhlelwe AmaZulu Community Trust ngokubambisana nabe Hollywood Bets Unite for Inclusive Youth Football. Ububanjelwe ezinkundleni zemidlalo eSiripat Sports Grounds eseReservoir Hills ngomhlaka 12-13 Agasti 2023
Kulomqhudelwano we The Hollywoodbets Siyakhula Under 15 Cup, wabadlali bebhola bamantombazane kanye nabafana abangaphansi kweminyaka engu 15, mabili amaqembu adle umhlanganiso okube elabafana okuyiNduna Sports Academy kanye nelamantombazane leSenzokuhle FC. Womabili lamaqembu athole umklomelo wesamba sika R10,000 ngalinye wezimpahla zokudlala (sports equipment) exhaswe abakwa Hollywoodbets.
Lomqhudelwano usuthole isasasa elikhulu ngenxa yeqhaza lawo lokusiza ukucija abadlali abasafufusa kwezebhola lezinyawo, lomqhudelwano uphinde ubanikeze ithuba lokuqhakambisa amathalente abo.
USenzo Mkhize ongumqeqeshi weSenzokuhle FC uthe “ Siyajabula kakhulu ukuthola ithuba lokumenywa ukuthi nathi sibambe iqhaza kulomqhudelwano webhola lezinyawo ikakhulukazi njengoba kuyinyanga yabantu besifazane, siyaziqhenya ngamantombazane ethu ngokuwina, lomklomelo uzokwenza lukhulu ukusiza ukuthuthukisa amantombazane”.
U-Indira Albuquerque oyi Senior Sponsorship Coordinator yakwaHollywood Bets uzwakalise ukuthi loluhlobo lwemiqhudelwano alugcini nje ngokuveza ithuba lokuncintisana entsheni, kodwa liphinde liveze amathuba okuqhakambisa amathalente abadlali.
“ Sizwakalisa ukubongela Induna Academy kanye ne Senzokuhle Academy ngomdlalo wabo omuhle kakhulu, siyajabula futhi ukubona amantombazane ebamba iqhaza emqhudelwaneni ofana nalona, sinethemba lokuthi uzoqhubeka nokukhula.Kuhle futhi ukuthi sikwazile ukwakha ubuhlobo bokusebenzisana phakathi kwaMaZulu Community Trust kanye ne SAFA eThekwini ukwenza lomqhudelwano ube yimpumelelo”. Kuphetha uIndira.
