OWAMI THABETHE
UNOBHALA-jikelele we-African National Congress (ANC) uFikile Mbalula uthe iqembu lizosebenza kanzima ukubuyisa amandla alo alahleka KwaZulu-Natali ngemuva kokuhlulwa okhethweni lwangoMeyi 29.
UMbalula ukusho lokhu esithangamini nabezindaba KwaZulu-Natali ngemuva kohambo lwezinsuku ezimbili lweKomidi lokuSebenza likaZwelonke liyobuyekeza imiphumela yokhetho lukazwelonke lwangoMeyi 2024.
I-ANC esifundazweni ilahlekelwe ngamavoti okhethweni, yathola amavoti amancane angu-17% ngaleyo ndlela yathola izihlalo ezingu-14 kuphela endaweni enezihlalo ezingu-80, okuyisibalo sehle sisuka ku-54% okhethweni olwedlule.
Ekhuluma ngokhetho lukazwelonke, uMbalula uvumile ukuthi i-ANC ilahlekelwe ngamavoti esifundazweni kodwa wezwakalisa ukuzethemba ukuthi iqembu lizobuya ngamandla.
“Siyazethemba ukuthi sizobuya, ngoba sinamandla futhi sinobuhlakani bokuqonda inkinga nokuthi singayixazulula kanjani,” kusho uMbalula.
UMbalula usole ukwehluleka kweqembu ukuthola amavoti amaningi ngenxa yeqembu likaZuma iMK.
“Njengoba umnotho ukhula sizokwenza lokhu ebesithe sizokwenza ku-manifesto yethu ezobuyisa ukuzethemba kwabantu ku-ANC. Silahlekelwe kakhulu eKZN ngenxa kaJacob Zuma futhi sidinga ukubuyisa lokho okusilahlekele lapha kulesi sifundazwe”, kuqhuba uMbalula.
Ngaphezu kwalokho, uthe bazosebenzisa izinhlelo zokusebenza kuso sonke isifundazwe, bagxile ekuphatheni nasekuhleleni kabusha iqembu. Uphethe ngokuthi manje akusona isikhathi sezingxabano nokusolana, kodwa yisikhathi sokuqonda ukuthi konakelephi.
