OWAMI THABETHE
Kuzoqopheka umlando emkhosini womhlanga wakulonyanga njengoba kuzobe kubungazwa iminyaka engu-40 kwavuselelwa kabusha. Lo mkhosi uhanjelwa izinkulungwane zezintombi eziqhamuka ezindaweni ezehlukene okubalwa nezingaphandle kwesifundazwe iKwaZulu-Natali.
Lomkhosi uvamise ukubanjwa ngenyanga ka Mandulo (September) esiGodlweni eNyokeni kwaNongoma minyaka yonke. UMkhosi woMhlanga wasungulwa yiSilo uZwelithini kaBhekuzulu ngokubambisana neNdlovukazi uMantfombi, uMaDlamini ngo-1984. Kulo nyaka izintombi imihlanga zizoyihloma phambi kweSilo uMisuzulu kaZwelithini.
Njengenhlalayenza, uMkhosi woMhlanga uzoqala esigodlweni eMachobeni, eNgwavuma, ngoSepthemba 7. NgoSepthemba 14 kuyobe sekulandela umkhosi omkhulu ozokuba sesigodlweni eNyokeni, kwaNongoma.
UMkhosi wakulo nyaka kuzogqanyiswa kakhulu ibanga eselihanjwe yilo mkhosi.
Umthombo osondelene namalungiselelo omkhosi uxoxele Isolezwe ukuthi kuyinto enkulu ukuthi umkhosi uzohlanganisa iminyaka ewu-40 wavuselelwa.
“UMkhosi woMhlanga ungeminye yemikhosi egqamile lapha KwaZulu. Isasasa lilokhu likhule njalo, kwahlula nangesikhathi umkhosi uphazanyiswa iCorona. Nombango wesihlalo sobukhosi awuzange uwuphazamise umkhosi. Ingakho ke kuzogqanyiswa ukufinyelela komkhosi kule ngqophamlando.
“UMkhosi woMhlanga ubambe elikhulu iqhaza ekwakheni intsha. Ukhuthaza izintombi ukuba zizithibe, zingajahi izinto ezingalungile. Ingakho kwathathwa isinqumo sokuthi uvuselelwe kabusha ngoba kwakubonakala ukuthi intsha ibhekene nezinkinga eziningi,” kuchaza umthombo.
Umthombo uthe ngeke bakukhohlwe okwenziwa iNdlovukazi uMantfombi ivuselela umkhosi ngesikhathi kubusa iSilo uGoodwill Zwelithini kaBhekuzulu.
“Ngiyacabanga ukuthi akuzange kube lula ukuvuselela umkhosi okwasekuphele isikhathi eside ungasenziwa. Ngibona ukuthi into eyalekelela indlovukazi ukuthi vele nakwaNgwane (eSwatini, lapho izalwa khona) uyenziwa uMkhosi woMhlanga.”
Kulindeleke izintombi ezingaphezu kuka 5000 ukuba zisingathe umkhosi wakulonyaka.
