Kuvuselelwa umculo weRabi (Irabi-Umkhumbane Jazz Heritage Celebration ihlelwa uMnu. Jeremiah Kunene owaziwa ngo Br Jerry Kunene ihlelwe ngokuhlanganyela ne KZNJAA (KwaZulu Natal Jazz Appreciators Association) ungomunye wezinqalabutho ezinegalelo elikhuluekuthuthukiseni umculo we Jazz eNingizimu Africa.
kanti uze wafinyelela nakwamanye amazwe nangaphesheya kwezilwandle. Leliciko eselihlanganise iminyaka engu 83 lisadla anhlavana, lingelinye lamaciko asekhulile esinawo kuleli likaMthaniya azibiza ngoMkhumbane Jazz Ensemble. Leliqembu lisanda kudla umhlanganiso kuMzansi Musical Instrumentalist Awards obewenziwa iDurban ICC ngempelasonto ka 6 Novemba 2022. Abanye abahlabene uBongani Nkwanyana kanye noMthobisi Mthalane osanda kuhlabana ngendondo ye Best Afro Jazz Artist kuma SATMA Awards 2022. Bonke bangaphansi kwe Nkampani yezokuqopha iSagiya Records. “Ngibone kuyisidingo esikhulu ukuba sigubhe lempumelelo ngokuvuselela umculo weRabi njengomculo oyisisusa sawo wonke umculo esinawo eNingizimu Africa. Ngokuhlanganyela neSagiya Foundation ne KZNJAA ngibona kuzoba usuku oluyingqayizivele ukulekelela ukukhumbula lapho savela khona endimeni yezomculo.”kusho uKunene.
Ngosizo lwakwa National Arts Council, SA National Department of Sports, Arts and Culture ngohlelo lwe PESP akungabazeki ukuthi lolusuku luzoba yimpumelelo. iKwaZulu Natal Jazz Appreciators Association ngalolusuku izobe yethula umthethosisekelo wayo iphinde yethule nethimba le KZNJAA PEC, phambi kwamalunga ayo aqhamuka kwamanye ama Jazz Associations azobe esuka kuzo zonke iziFundazwe zaKwaZulu Natal, ayamenywa, izinhloso zeKZNJAA: Ukuthuthukisa nokuqhakambisa uthando lweJazz edidiyelwe kwaZulu Natal, eNingizimu Africa kanye nakwamanye amazwe ngokwahlukahlukana kwayo iJazz; ukwakha nokuqinisa ubudlelwane phakathi kwezinhlaka ezahlukahlukene njengoMnyango WeZemidlalo, Ezobuciko naMasiko kazwelonke, Izifundazwe, Omasipala, Ama University, abezokuhweba abazimele nabanye abasezikhungweni eziseNingizimu Africa ukuze kwakhiwe ubudlelwane ekutholeni izinsiza kusebenza nezakhiwo ezifanele ukuthuthukisa ezokuvakasha, ezokungcebeleka, nezikaqeda isizungu nokuthuthukiswa komnotho; ukubhalwa komqulu oqukethe imininingwane yamalunga abathandi beJazz, abaxhasi, kanye nabaculi beJazz.
Ukwakha izinhlelo ezihambelana nokulwisana nokuhlukunyezwa kwabesimame nezingane (GBV). Uma kuphela uhlelo lokwethulwa komthetho sisekelo we KZNJAA abathandi be jazz bazobe sebengena ohlelweni lwe Irabi-Umkhumbane Jazz Heritage Celebration. oDJ be Jazz abaphuma kuma Jazz Clubs nabo bayodedelana inkundla beqhulula amanoni abadume ngawo ngakubo.
UMnu. Kunene uthe, uhlelo lwe Irabi-Umkhumbane Jazz Heritage Project uhlelo lokucobelelana ngolwazi nokugubha iRabi Jazz njenge gugu elingumsuka wokwakheka kwazo zonke izinhlobo zomculo njenge Township Jazz eyakheka ngenhlanganisela ye Afro Jazz, Afro Soul, Umbhaqanga, Umgqashiyo, Umgxobanyawo, UMaskandi, okwagcina sekuzaleka oKwaito naMapiyano imbala. Umculo wase Nigeria, iCongo, namanye amazwe akhulisa umculo wawo wagcina usubizwa nge Afro Beat. INingizimu Afrika yona yakha iGqom naMapiyano okuyiwona adume umhlaba wonke kulezi zinsuku. Imiculo yonke edumile yakheka ngokusebenzisa imisindo eyavela kuIrabi Jazz. Lomsindo ubizwa nge I-VI-V (1-4-5) eyinhlanganisela yemisindo emithathu.
Lemisindo yakhula nomuntu yaze yamufikisa ekwakhiweni kwaMapiyano kube kungakhathalekile nokuthi ukhona yini umsindo wePiano engomeni, kodwa ubutlavatlava be synthesiser nezigubhu iyaphumelela ingoma ukubizwa ngamapiano. Mhlawumbe indlela edanseleka ngayo. Nge Irabi-Umkhumbane Jazz Heritage Celebration, uKunene akasho ukuthi iRabi laqanjwa eMkhumbane kodwa uMkhumbane ingenye yezindawo eyayihlanganisa abezizwe ezahlukahlukene bese kuba khona izindlela zokuzijabulisa. Abaculi babehlangana bahlukane baphinde bahlangane bethelelana ulwazi.
Irabi kwaba iwona mculo ababesina bededelana ngawo ezindaweni ezifana nabo District Six, Sophia Town kanye nase Marabastad. Umangabe uthatha ifanamsindo legama ungavuma ukuthi isigqi samarabi saqanjwa kususelwa kuMarabastad. Ngokudlalisa ulimi ngesitsotsi kwagcina kuthiwa Irabi ngama 1960.
Uhlelo lwe Irabi-Umkhumbane Jazz Heritage luthathe amaqembu ayisithupha abaculi bejazz base Ethekwini namaphethelo ukuze kwakhiwe iKhonsathi yesigqi saMarabi. Ilaba: Sheila Da Bluenote, Royalson, Pat Zondi Impolompolo, Sifiso Cele, Nhlanhla Molestane ne MilkyWay. Bazophinde bathole ithuba lokufunda bacwaningisise udaba lokuhweba ngezomculo phecelezi (Digital Music Distribution, Monetization and Copyright Law). Uhlelo lokufunda luqale mhlaka 17 Novemba 2022 luyogcina ziwu-10 Disemba 2022. Ama workshops omculo azobe egxile kubadlali balezi zinsimbi: Saxophones, Trumpets, Pianos, Bass Guitars, Jazz Guitars, Drums, Accordion, Voice, Ensemble and Improvisation. Uhlelo lokuthathwa kwabaculi abazoba ingxenye yakho konke seluphothuliwe. Abaqeqeshi ezinsimbini kuzobe kuyilaba: Jerry Kunene ku Saxophone, Bhekisigcino Luthuli ku Trumpet, Vincent Mtetwa ku Piano, KB Maphumulo ku Bass Guitar, Mduduzi Mahlobo ku Guitar, Xolisa Dlamini ku Voice, Atlas Duma kuma Drums naku Music Business Master Classes.
