SHEILA MHLONGO
ISagiya Foundation ngokubambisana ne KZN Jazz Appreciators Association izokwethula i KZN International Jazz Festival 2023, ezoba ngomhlaka 3 kuJuni. Lokhu kuza emuva kokuthi ngomhlaka 30 April kwethulwe ngokusemthethweni yona lendumezulu yeJazz, eUniversity of KwaZulu Natal Centre for Jazz.
Ngokwesitatimende esithunyelwe kwabezindaba sithi, lendumezulu yeJazz ixhaswe ngisho nanguMnyango wezeMidlalo, ezobuCiko, kanye namaSiko kuzwe lonke kanti uzobe ubanjelwe eThe Station, 65 Masabalala Yengwa, eStamford Hill eThekwini.
Siqhuba isitatimende sithi ukwethulwa kwe International Jazz Festival 2023 bekuhambisana nokubungazwa kweminyaka engu 40 uPhiko lwe UKZN Music Department, laqala uhlelo lokufunda nokufundiswa komculo weJazz.
Lomcimbi wokwethulwa kwalendumezulu yeJazz ibithanyelwe ukhansela Nkosenhle Madlala, amalunga esiGungu esiphezulu eMkhandlwini weTheku, kanye noSihlalo we Governance and HR, uSolwazi uSihawu Ngubane, iDean of Music in Education e UKZN, uMnu Eric Apelgren onguMphathi woMnyango we International Relations,eThekwini,
uMnu. Howard Msomi uNobhala Jikelele weCCIFSA (Cultural and Creative Industry Federation of South Africa), Sibusiso Vivian Mlambo, uNobhala Jikelele we KZNJAA (KZN Jazz Appreciators Association), uAtlas Duma no Xolisa Dlamini we Sagiya Foundation, kanye nomsunguli weKZN International Jazz Festival okuyibo abasika iribhini lokwethula umcimbi.
Lendumezulu yeJazz Festival izobe ibophele izingwazi ezifana
No-Richard Bona wase USA, Yayoi Ikawa wase Japan. Lapha eMzansi singabala, Selaelo Selota, Dktl. Nduduzo Makhathini no Mbuso Khoza (Abasemkhathi Project), Umkhumbane Jazz Ensemble, Xolisa Dlamini, ehambisana noZawadi Yamungu, Mthobisi Mthalane, Trio of Nibs Van Der Spuy, Neil Gonsalves, Demi Fernandez, Bongani Nkwanyana nabanye.
