Ongeziwe Ntondini
uAviwe Anitha Klass Uchaza Ngokubaluleka Kokunakekela Impilo Yengqondo Ngesikhathi Kubungazwa Usuku Lwabesifazane KwaMashu Umcimbi wokugubha Usuku Lwabesifazane ubanjelwe eHholo Lomphakathi KwaMashu mhla ziyi-16 kuNcwaba (August).
Lo mcimbi ubuhlelwe yiVibe FM ngokubambisana nephephandaba iNkundla Yezindaba, ngenhloso yokukhulisa ulwazi nokuxoxa ngezihloko ezithinta abesifazane emphakathini.
Omunye wabakhulume kulo mcimbi uDkt. Aviwe Anitha Klass, ongudokotela onguchwepheshe kwezengqondo (clinical psychologist), obeke ugqozi ekubalulekeni kokunakekela impilo yengqondo (mental health), ikakhulukazi njengoba abesifazane behlaselwa kakhulu izinkinga zalo mkhakha.
Aviwe uqale ngokucacisa ukuthi impilo yengqondo ihlanganisa indlela ocabanga ngayo, indlela ophatha ngayo impilo yakho kanye nokuziphatha kwakho. Uthe izinkinga ezivamile zihlanganisa: Ukucindezeleka (Depression) Ukukhathazeka ngokweqile (Anxiety) Ukuhlaselwa wukwesaba okungazelelwe (Panic Attack) Izinkinga zokuhlushwa yizigameko zangaphambilini (Post-Traumatic Stress Disorder – PTSD) Uchaze ngokujulile ukuthi ukucindezeleka kuwuhlobo lwesifo somqondo olubangela umuzwa oqhubekayo wokudabuka nokulahlekelwa intshisekelo ezintweni ezijabulisayo.
“Lokhu kuthinta indlela ozizwa ngayo, ocabanga ngayo, nokuziphatha kwakho, bese kuholela ezinkingeni ezingokomzwelo nezomzimba,” kusho yena. U-Aviwe ugcizelele ukuthi abantu abaningi basadidekile uma kukhulunywa ngempilo yengqondo. Wathi: “Uma une-mental health disorder akusho ukuthi uhlanya noma ugula kabi. Wonke umuntu unesimo sakhe esihlukile; abanye sebehlonzwe, kanti abanye abazi lutho ngaso.”
Uphinde wagcizelela izimpawu okufanele abantu bazibheke, ikakhulukazi ekucindezelekeni, ezifana nokukhathazeka okukhulu, ukuphelelwa umdlandla wokwenza izinto ojwayele ukuzithokozela ngazo, ukuzihlukanisa nabanye, kanye nokulahlekelwa ukuzethemba. Wakhuthaza ukuthi abantu abanezimpawu ezifana nalezi bafune usizo kodokotela noma ochwepheshe bezempilo yengqondo, futhi bathathe imithi ebhalwe ngudokotela uma kudingekile.
Ngokuphathelene ne-panic attack, u-Aviwe uchazile ukuthi ivame ukubangelwa wukubhekana nezimo umuntu angazijwayele, okugcina kubangele ukukhathazeka nokungakwazi ukuphefumula kahle. Lokhu, wengezelela, kungaba enye yezimpawu zokucindezeleka. Uchaze futhi nge-trauma, ethi imvamisa ayidalwa izinto ezenzeka manje kuphela, kodwa ivela nasezinto ezibuhlungu ezenzeka esikhathini esedlule njengengozi yomgwaqo noma ezinye izehlakalo ezibuhlungu.
Ekuphetheni, u-Aviwe ugcizelele ukuthi kubalulekile ukuthi wonke umuntu azi ngobungozi bezinkinga zempilo yengqondo. “Uma ungazinaki, lezi zinkinga zingabulala. Abanye balala, kodwa abangabe besavuka ngenxa yokucindezeleka. Ngakho-ke, abantu mabazinakekele, bahloniphe impilo yabo,” kusho yena. Lo mcimbi ukhombise ukuthi usuku olufana nolwabekwa ngenhloso yokuhlonipha abesifazane, lungasetshenziswa futhi ukukhuluma ngezindaba ezithinta umphakathi wonke, ikakhulukazi ezempilo yengqondo ezisadinga ukuqondwa kabanzi.
