IMeya yeTheku income ukubambisana phakathi kukaMasipala weTheku kanye neChweba lakwaTransnet Port Terminals (TPT eliseThwekwini ukuze kuthuthukiswe ukusebenza kahle, ukwakha umthamo kanye nokudambisa isiminyaminya echwebeni laseThekwini sekuqala ukuthela izithelo ezinhle.
Lokhu kuvele emhlanganweni wamasu obizwe yiMeya kaMasipala weTheku, uKhansela Cyril Xaba ukuthola umbiko ogcwele ngenqubekelaphambili eyenziwa yi-TPT ukwakha kabusha amandla echweba ukuze kweseke ukukhula komnotho wedolobha.
Ekhuluma emhlanganweni obuseDurban Container Terminal, obuhanjelwe nayiMenenja yeDolobha, uMusa Mbhele nabaphathi bakhe abaphezulu, iMeya uXaba uthe iTPT ibamba elikhulu iqhaza embonweni kamasipala wokukhulisa ichweba laseThekwini ukuze libe yichweba elikwazi ukuncintisana emhlabeni jikelele.
Ubalule amaphrojekthi amaningi abalulekile asendleleni azofaka isandla ekuthuthukiseni izinhlelo eziklanyelwe ukubhekana nesiminyaminya echwebeni. Le miklamo ihlanganisa ukwakhiwa kwechweba elomile e-Cato Ridge kanye nokuthuthukiswa kwengqalasizinda yezitimela ezinkulu, okuzoholela ekuthuthweni kwempahla isuka emgwaqeni iye kwesinye isitimela.
