SHEILA MHLONGO
UMasipala waseThekwini uthathe isinqumo esimqoka sokulwa nenani elikhulayo lokukhulelwa kwentsha edolobheni ngokubamba iNdaba Yokukhulelwa Kwentsha mhla zingama-20 kuMeyi e-INkosi Albert Luthuli International Convention Centre, eThekwini.
Le Ndaba ihlanganise abathintekayo abavela emikhakheni ehlukahlukene ukuze kubhekwane nale nselelo enkulu kwezokuxhumana, ezempilo nezomnotho. Inani elikhulayo lamantombazane aneminyaka ephakathi kuka-10 no-19 akhulelwe eThekwini liyamangaza, kanti liphinde libangele imiphumela emibi efana nokwanda kokutheleleka nge-HIV ukushiya isikole kanye nokuqhubeka kwendlala.
Idatha yomkhandlu ikhombisa ukuthi kusukela ngo-Ephreli 2024 kuya ku-Ephreli 2025 kwaqoshwa izigameko zokukhulelwa kwentsha eziyi-7 627 okuhlanganisa namantombazane angama-154 aneminyaka ephakathi kuka-10 no-14.
IPhini leMeya yaseThekwini uKhansela Zandile Myeni, ugcizelele isidingo esiphuthumayo sokubambisana phakathi kwemikhakha ehlukene nomphakathi.
“Ukuze isifundazwe sinciphise ukukhulelwa kwezingane nentsha, uMasipala waseThekwini udinga indlela eqondile nezixazululo ezisebenzayo ngaphambi kokuba ukukhulelwa kwentsha kube inkinga yomphakathi yezempilo nenhlalakahle. Ukukhulelwa kusenesikhathi kuthinta hhayi umama omncane nengane kuphela, kodwa nomphakathi wonke. Kumele futhi sifake nezindlela zokuvimbela i-HIV kule mizamo.” kusho uPhini likaMeya uMyeni.
Le Ndaba iphinde yaveza idatha ethusayo mayelana nokuhushulwa kwezisu, lapho cishe intsha engama-582 ngenyanga ithola ukusizwa ngokuqeda ukukhulelwa ezikhungweni zezempilo zikamasipala. Lesisibalo asihlanganisi labo abenza lokhu ezindaweni ezingekho emthethweni nezingaphephile.
Isethulo sikaMasipala sihlanganise uhlu lwezikole eziphezulu eziyishumi lapho kubikwe khona inani eliphezulu labafundi abakhulelwe kusukela ngoJanuwari kuya kuMashi 2025. Izindawo ezibhekene nenkinga enkulu zifaka phakathi iNanda, KwaMashu, Hammarsdale, KwaDabeka, KwaNyuswa, Tshelimnyama, uMlazi kanye neChatsworth.
Enye yezinhlelo ezagqanyiswa wuhlelo lwe-Zero Percent Learner Pregnancy Programme, olwasungulwa eminyakeni emibili edlule ngaphansi kweDistrict AIDS Council. Lolu hlelo lunika amandla amantombazane ukuthi aqhubeke nesikole futhi lukhuthaza ulwazi lwezempilo yocansi kubafundi.
“Ukukhulelwa kwentsha kuyinkinga enkulu kwezempilo yomphakathi. Kubonisa ukuthi iningi lentsha liyazibandakanya ngokocansi olungaphephile, okwandisa ubungozi bokutheleleka nge-HIV. Izibalo ziphazamisa kakhulu amantombazane aneminyaka engu-10 kuya ku-14. Sidinga ukubambisana kwabazali, othisha, abaholi bomphakathi nohulumeni ukubhekana nalolu daba,” kuphetha uPhini likaMeya uMyeni.
UNdlunkulu kaZulu uMaNdlovu naye ube ngomunye abathamele Indaba
