SHEILA MHLONGO
UMasipala waseThekwini, ngeyunithi ngaphansi koPhiko lwezaManzi kanye neZokuhlanza, uzokwandisa izinyathelo zokuphatha amanzi kahle ngokufaka ama-valvu anciphisa ingcindezi (Pressure Reducing Valves – PRVs) ezindaweni ezibalulekile zenethiwekhi yamanzi edolobheni.
Lokhu kumenyezelwe emhlanganweni weKomidi Eliphezulu Lokuphatha (EXCO) ngoLwesibili lomhlaka-18 Juni, lapho kuthathwe izinqumo eziningana zokusheshisa ukuqaliswa kwezinhlelo kanye nokubhekana nezinselele zamanje ezibhekene nomasipala.
Uhlu lwezinyathelo ezamukelwe lubandakanya isinqumo sokubhekana nezinkinga ezikhona zokulethwa kwezinsiza zamanzi ngendlela esheshayo. IWater and Sanitation Unit ibonise uhlelo lwesenzo oluhambisana noHlelo Lokubuyisela Uhlelo Lwamanzi (Water Turnaround Strategy), oluhlose ukwehlisa inani lamanzi alahlekayo (non-revenue water) aze afike ezingeni elamukelekile.
UMasipala uthe ukufakwa kwama-PRVs kuyingxenye ebalulekile yokulawula ingcindezi yamanzi kahle nokunciphisa ukuqhuma kwemibhobho kanye nokuvuza kwamanzi, okuholela ekulahlekelweni kwamanzi amaningi.
“Eminye imizamo yaloluhlelo ihlanganisa ukufakwa kwezinqamuleli zamanzi, ukuvuselelwa kwezindawo zokukala amanzi, izinkontileka ezisekelwe ekusebenzeni zokuthola nokuqeda ukuvuza, ukufakwa kwamalogi nokunye ,” kusho umkhosi womhlangano.
Lezi zinhlelo zisesigabeni sokuthengwa kwezimpahla (procurement process).
Ubambiswano lwamasu nezikhungo zemfundo luyavuselelwa
UMhlangano we-EXCO uphinde wamukela ukuvuselelwa kwesivumelwano seminyaka emithathu (MoA) nezikhungo ezihamba phambili zemfundo ephakeme ngenhloso yokuxhasa ucwaningo oluhlanganyelwayo oluzosiza ekuthuthukiseni inqubomgomo kanye nokuletha insiza engcono.
Lesi sivumelwano esisha siqala ukusebenza ngomhlaka-1 Julayi 2025 kuze kube umhlaka-30 Juni 2028, futhi sihlanganisa ubambiswano neNyuvesi yaKwaZulu-Natal (UKZN), iMangosuthu University of Technology (MUT), iStellenbosch University (SU), neNyuvesi yaseNingizimu Afrika (UNISA).
Umnu. Nkosenhle Madlala, ongusihlalo weKomidi Lezokuphatha kanye Nentuthuko Yabasebenzi, uthe lesi sivumelwano sizosiza iTheku ukuba ibe idolobha eliqaphelayo futhi elifunda njalo.
“Ngalezi zindlela zobambiswano, sizokwazi ukudala izixazululo ndawonye ezinkingeni zethu ezinzima zentuthuko, siqinisekisa ukuthi izinqubomgomo zethu zisekelwe ocwaningweni olujulile nolunobuhlakani,” kusho uMadlala.
La maqembu azobambisana ngokuxhasana kwezimali okulinganayo (1:1) ukuze kwenziwe ucwaningo olubalulekile noluhlanganyelwayo.
Uhla lwezimali ezizofakwa uMkhandlu zimi kanje:
- Unyaka wezimali ka-2025/26: R500 000
- Unyaka wezimali ka-2026/27: R1 000 000
- Unyaka wezimali ka-2027/28: R1 500 000
Kuzosungulwa amakhomidi amabili ukuqinisekisa ukusebenza kahle kwalesi sivumelwano: iKomidi Lwezocwaningo kanye Nezokusebenza, kanye neKomidi Eliqondisayo. – SAnews.gov.za
