SHEILA MHLONGO
UMasipala weTheku uphasise ukuthi kudluliselwe isabelomali sesamba sika R2million ngaphakathi kwesabelomali sezamanzi nezokuthuthwa kwendle ku-2024/25 ukuze kubhekwane nezinkinga zamanzi ezihlala ziphinda zavela, ikakhulukazi eVerulam nasezindaweni ezizungezile.
Isinqumo sithathwe emhlanganweni weKomiti Eliphezulu Ledolobha (EXCO) mhla zingu-25 Mashi 2025.
Izimali zizodluliselwa kusuka kuphrojekthi yasePinkney Park ziye kuphrojekthi yepayipi le-Hazelmere to Grange Reservoir, njengoba le phrojekthi idinga imali eyengeziwe ukuze iqedwe.
UMasipala uthe ukushoda kwezimali kuholele ekumeni komsebenzi kanti le ngxenye eyengeziwe izonikeza usizo oludingeka kakhulu kubantu abahlala enyakatho yeTheku abahlushwa ukushoda kwamanzi.
Izinkinga zamanzi ziye zaba zimbi kakhulu ngenxa yezikhukhula eziqhubekayo KwaZulu-Natal.
Kuphasiswe isamba sika-R3 million sokuthuthukisa i-crematorium yase-oThongathi
I-EXCO iphinde yaphasisa ukwengeza i-R3 million wokushintsha i-furnace e-oThongathi Crematorium. Lokhu kulandela isabelo sokuqala se-R5 million, okwenza imali iyonke ibe yi-R8 million.
UMeya weTheku, uKhansela Cyril Xaba, uthe lesi sinqumo sibonisa ukuzibophezela kwedolobha ekuqinisekiseni ukuthi izakhamuzi zinethuba lokusebenzisa icremation.
Icremotorium ekhona ibihlala iphuka futhi yaphela amandla mhla zingu 24 Januwari 2025. Ukuhlolwa kobuchwepheshe kuqinisekise ukuthi i-furnace isifinyelele ekugcineni kwempilo yayo, okwenza kube nesidingo sokuyishintsha ngokuphelele.
UMasipala uzoqasha inkampani yaseNingizimu Afrika ukuze yakhe, ifake futhi inikeze ukugcinwa kwemishini iminyaka emibili ngemuva kwesiqinisekiso sokuqala sezinyanga eziyi-12.
UXaba uthe idolobha lizoqhubeka linikeze izakhamizi izibuyekezo mayelana nenqubekela phambili yephrojekthi.
Bottom of Form
