SBUH MAMBA
Umqeqeshi weNatal Richboys ( Richards Bay FC) uPapi Zothwane uncome abadlali bakhe ebuya namaphuzu agcwele kubafana bokuthula noxolo iKaizer Chiefs emdlalweni weBetway Premiership obuse King Zwelithini Stadium eMlazi ngesonto ntambama, iBay inqobe lomdlalo ngamagoli amabili eqandeni, amagoli eNatal Richboys ashaywe uFezile Gcaba ngomzuzu ka-48 kanti elesibili libekwe enethini insizwa yaseLamontville uYanela Mbuthuma.
UZothwane ujoyine leliqembu lakwaZulu Natal ekuqaleni kwalonyaka esuka kuMagesi FC yaseLimpopo , iRichardsbay elinye lamaqembu elidume ngokuhlala livika izembe njalo uma sekuzophela isizini ngonyaka odlule laqeda kunamba 15 labuya sekuvalwe amehlo lakwazi ukulwela indawo yalo kuDSTV Premiership sekudlalwa ama Playoffs. Umfoka Zothwane ujabule kakhulu ngalomphumela , lamaphuzu amathathu athathe iRichardsbay ayibeka endaweni enhle kunamba 11 yathi kuphuma kancane ezembeni kanti iChiefs ebhekwe yisambane ayiyindawo isazohlala kunamba 8 ku -log. Ekhuluma nabezindaba umfoka Zothwane uthe uthanda ukubonga abadlali bakhe ngalomphumela , uthe akulula ukudlala neKaizer Chiefs enabadlali abasezingeni eliphezulu , ubonge unozinti nezitobha zakhe ezisebenze kanzima esiwombeni sokuqala zivimba abagadli beChiefs. Amakhosi azalelwe yinja endlini njengoba naku Nedbank Cup Semi Finals ngenzeka babhekane neMamelodi Sundowns engagayelwa mphako kulezi zinsuku.
Kanti lamaqembu bebophele kanjena soqala ngeKaizer Chiefs emapalini bekugijima uBvuma kube uDove, Solomons, Miguel, Msimango, Cele , Mthethwa, Shabalala , Mmodi, Lilepo, DuPreez kanti ebhentshini bekuno Ntwari , Kwinika , Cross, Castillo, Maart, Ngcobo , Sirino , Duba noVilakazi . IRichards yona ibigadla ngo Magoola emapalini kube uGcaba , Mcineka, Mabua, Ndaba, Zikhali, Mthembu, Mhlongo , Ntsundwana , Figareido, Mbuthuma , kanti ebhentshini bekuhleli u-Otieno, Gumede, Ngema , Kutumela , Bomelo, Mohloamme, Zulu, Machuphu noMntungwa.
