ESITHOMBENI:
UPhiko LwezokuThuthukiswa Komphakathi Nezenhlalo (Social and Community Development Directorate) luhlomulise izinhlangano zomphakathi ezingu-111 ngezimali zoxhaso lwe-Grant-in-Aid ezibalelwa ku-R5.5 million onyakeni wezimali ka-2025/2026.
UMasipala weTheku uyaqhubeka nemizamo yawo yokuthuthukisa imiphakathi ngokuhlomulisa izinhlangano ezingenzi inzuzo ezingu-111 ngezimali zoxhaso lwe-Grant-in-Aid ezibalelwa ku-R5.5 million onyakeni wezimali ka-2025/2026.
Abamukeli balolu xhaso bahlanganisa izinhlangano ezngekho ngaphansi kukahulumeni (NGOs), izinhlangano ezingenzi nzuzo (NPOs), kanye nezinhlangano zomphakathi ezidlala indima ebalulekile ekuthuthukiseni izimpilo zabahlali.
Ekhuluma emcimbini wokuklomelisa obubanjwe mhla zi-03 kuJuni 2026 e-Durban International Convention Centre (ICC), uSihlalo weKomidi Lezinsiza Zomphakathi, uKhansela Zama Sokhabase, uthe lolu hlelo lukhombisa ukuzibophezela okuqhubekayo kweDolobha ekuthuthukiseni imiphakathi.
“Izimali ze-Grant-in-Aid zinikeza uxhaso lwezimali olubalulekile ezinhlanganweni ezisebenza ngqo emiphakathini.
Eminyakeni emithathu edlule, cishe u-R18 million usetshenzisiwe ukweseka izinhlangano ezingenzi nzuzo (NPOs), kwaxhamula izinhlangano ezingaba ngu-333 ngohlelo lwe-Sundry Grant-in-Aid.
Lezi zinhlangano zisebenza emikhakheni ehlukahlukene okubalwa kuyo ukuThuthukiswa Kwezingane Ezisencane (ECD), inhlalakahle yomphakathi, ezemidlalo, ezobuciko namasiko, ukuthuthukiswa komnotho, ukuthuthukiswa kwamakhono, kanye nezinhlelo eziholwa izinhlangano zezenkolo,” kusho yena.
UKhansela Sokhabase uphawule ngokuthi lolu xhaso lunika izinhlangano amandla okuphendula ngempumelelo ezidingweni ezahlukene zemiphakathi.
“Siyakhuthazeka ukubona uMasipala uqhubeka nokweseka izinhlangano zomphakathi, uzinike amandla okuqalisa izinhlelo nezindlela zokungenelela ezinomthelela omuhle ezimpilweni zabahlali,” engeza.
UMasipala ukhuthaza izinhlangano ezifanelekile ukuthi zifake izicelo zokuthola uxhaso lwe-Grant-in-Aid lonyaka wezimali ka-2026/2027.
Izicelo zivulwe mhla lu-1 kuNhlangulana 2026 futhi zizovalwa mhla zingama-31 kuNtulikazi 2026.
Izicelo zivulekele izinhlangano ezibhalisiwe ezihlangabezana nezimfuneko ezibekwe kunqubomgomo ye-Grant-in-Aid.
Izinhlangano ezisebenza emikhakheni yezemidlalo, ukuthuthukiswa kwezingane ezisencane, amasiko nezokungcebeleka, ukuthuthukiswa komnotho, inhlalakahle yomphakathi, ukuthuthukiswa kwamakhono, kanye nemisebenzi yezenkolo zingabhekelwa ukuthola uxhaso.
Amafomu okufaka izicelo ayatholakala kuwebhusayithi kaMasipala ethi www.durban.gov.za, kanye nasehhovisi le-SCDD eliku-26 Mathews Meyiwa Road (eyayaziwa nge-Old Stamford Hill Road), eGreyville (esitezi sesi-6), emahhovisi amakhansela kanye nasemahhovisi ezifunda e-SCDD.
