SHEILAMHLONGO
UMengameli uCyril Ramaphosa uqoke uMmeli uDinkie Portia Dube njengePhini loMvikeli woMphakathi weRiphabhulikhi yaseNingizimu Afrika isikhathi seminyaka eyisikhombisa, kusukela mhla ka-1 ku-Febhuwari 2026.
Esitatimendeni esikhishwe ngoLwesine olwedlule, iHhovisi likaMongameli lithe ukuqokwa kwenziwe ngokuhambisana noSigaba 2A(1) soMthetho woMvikeli woMphakathi, ka-1994 (uMthetho No. 23 ka-1994), kulandela isincomo esivela ePhalamende Likazwelonke.
UMmeli uDube uletha isipiliyoni esingaphezu kweminyaka engama-20 emkhakheni kahulumeni, enolwazi olubanzi kwezokuqapha ukusebenza, ukuphathwa kwezikhalazo kanye nophenyo.
Njengamanje usebenza njengoMqondisi-Jikelele weKhomishini Yezinsiza Zikahulumeni. Ngaphambi kwalokho, ubesebenza njengoMqondisi Omkhulu: Wezokusebenza ehhovisi loMvikeli Wezempi.
Phakathi konyaka wezi-2011 nowezi-2014, uDube usebenze njengoMqondisi Wesifundazwe ehhovisi loMvikeli woMphakathi eGauteng.
Umlando wakhe wobungcweti uhlanganisa nokusebenza ekuxazululeni izikhalazo ehhovisi lokuvikela abathengi eMnyangweni wezohwebo nezimboni wangaphambilini, kanye nokusebenza njengommeli eKhomishini Yamalungelo Abantu yaseNingizimu Afrika.
“UMengameli uRamaphosa ufisela uMmeli uDube inhlanhla emsebenzini wakhe omusha ehhovisi loMvikeli woMphakathi, okuyinhlangano ephezulu yokuqapha ezokuphatha enegunya lokuphenya, ukubika nokulungisa ukuziphatha okungafanele kuzo zonke izindaba zombuso,” kusho iHhovisi likaMongameli. – SAnews.gov.za
