Ibheji lombutho wamaPhoyisa aseNingizimu Afrika
IBamba likaNgqongqoshe Wamaphoyisa, uFiroz Cachalia, ngoMsombuluko womhlaka 22 Juni, lihlangane nabaphathi beHhovisi lamaPhoyisa aseNingizimu Afrika (SAPS) ukuze lithole umbiko ophelele mayelana nesimo sokulungela ukusebenza kwe-SAPS ngaphambi kwemibhikisho ehlelelwe umhla ka-30 Juni 2026.
IBamba likaNgqongqoshe lihambisane neBamba likaKhomishana Kazwelonke we-SAPS, uLieutenant General Puleng Dimpane.
Lithole izethulo ezinemininingwane ngezinhlelo zokusebenza zikazwelonke nezifundazwe ezihlose ukuqinisekisa ukuthi yonke imibhikisho iba ngendlela ephephile, evikelekile futhi enokuthula.
Umhlangano ubuhanjelwe amaSekela oKhomishana Kazwelonke, oKhomishana Bezifundazwe kanye noKhomishana Beminyango yezokusebenza kanye neyobunhloli.
Ngemuva kokwethulwa kombiko, iBamba likaNgqongqoshe lizwakalise ukwaneliseka ngezinyathelo esezibekiwe yi-SAPS.
Ngesonto elizayo, iBamba likaNgqongqoshe, kanye namaSekela oNgqongqoshe Wamaphoyisa, bazohlangana noNgqongqoshe Wezokuvikela kanye noNdunankulu bezifundazwe zonke eziyisishiyagalolunye ukuze kuqiniswe ukusebenzisana nokubhekwa kwezinhlelo zokuphepha phakathi kwazo zonke izinhlaka ezithintekayo, futhi kuqinisekiswe ukuthi kukhona ukwesekwa okwanele ngaphambi kwemibhikisho ehleliwe.
Ngaphezu kwalokho, bazohlangana nabamele imboni yezokuphepha ezimele, beqaphela indima yabo ebalulekile ekwandiseni amandla okuqinisekisa ukuphepha nokuvikeleka.
UMnyango Wamaphoyisa uzophinde uvakashele izindawo ezihlonziwe ezike zabhekana nezinga eliphezulu lokungazinzi ukuze kuhlolwe ukulungela ukusebenza futhi kuqiniswe imizamo yamaphoyisa.
Nokho, iBamba likaNgqongqoshe lizwakalise ukuzethemba ukuthi i-SAPS ikulungele ngokugcwele ukusebenza ukuze kugcinwe futhi kuphoqelelwe umthetho.
“Nakuba ilungelo lomthethosisekelo lokubhikisha ngokuthula lizohlonishwa, akukho zenzo zokungahloniphi umthetho, udlame, ukwesabisa noma ubugebengu ezizobekezelelwa. Imikhankaso yamasonto onke yokuqinisa umthetho iyaqhubeka ukuze kuqinisekiswe isimo esisemthethweni sabantu bangaphandle abahlala kuleli lizwe.
“Le misebenzi ihlose ukuqinisekisa ukuthi bonke abantu bangaphandle abahlala eNingizimu Afrika bakuleli ngokusemthethweni futhi banemibhalo esemthethweni esebenzayo. Lapho kutholakala ukwephulwa komthetho, kuzothathwa izinyathelo ezifanele ngokuhambisana nomthetho,” kusho uNgqongqoshe Cachalia.
IBamba likaNgqongqoshe linxuse bonke oKhomishana Bezifundazwe ukuthi baphoqelele umthetho ngaphandle kokwesaba noma ukuchema, futhi baphendule ngokushesha nangokuqinile kunoma yiziphi izenzo zokugqugquzela udlame, ukwesabisa noma ubugebengu.
Liqinisekise bonke abantu baseNingizimu Afrika ukuthi ukuphepha nokuvikeleka kwabo kusemqoka, nokuthi i-SAPS izimisele ngokuphelele ukuvikela bonke abantu eRiphabhulikhi nokugcina uMthethosisekelo ngokugcina umthetho nokuhleleka, ngesikhathi esifanayo ivikela amalungelo awo wonke umuntu.
Ukuqapha ukusebenza kwansuku zonke kanye nokuhlola isimo kuzoqhubeka isonto lonke ukuze kuqinisekiswe ukuzinza ezweni lonke futhi kwenze izinhlaka zomthetho zikwazi ukuphendula ngokushesha kunoma yiziphi izinsongo ezingase zivele.– SAnews.gov.za
