Isithombe: UMasipala waseThekwini uphinde waqinisekisa ukuthi usukulungele ukusingatha umcimbi omkhulu we-Hollywoodbets Durban July ka-2026, ongomunye wemicimbi ehamba phambili kwezemidlalo nendlela yokuphila e-Afrika
Liyanda isasasa njengoba kusondela umcimbi we-Hollywoodbets Durban July wango-2026, kanti iDolobha laseThekwini seliqinisekise ukuzimisela nokulungela kwalo ukusingatha omunye wemicimbi emikhulu yezemidlalo, ezokungcebeleka nempilo yomphakathi e-Afrika.
Lokhu kulandela ukwethulwa ngokusemthethweni kwalo mcimbi kwabezindaba namuhla, mhla zingama-24 kuNhlangulana, eShongweni Club.
Ekhuluma kulo mcimbi, iMeya yeTheku, uKhansela Cyril Xaba, iqinisekise izakhamuzi, izivakashi kanye nabo bonke ababambiqhaza ukuthi iDolobha selikulungele ngokuphelele ukwamukela izinkulungwane zezivakashi okulindeleke ukuthi zitheleke eThekwini zizothamela lo mcimbi waminyaka yonke.
IMeya inikeze isibuyekezo ngamalungiselelo alo mcimbi ohlanganisa umjaho wamahhashi osezingeni lomhlaba, imfashini esezingeni eliphezulu, ezokuzijabulisa kanye nokwamukela izivakashi ngendlela evelele okuyisiko laseThekwini.
“Impelasonto yeDurban July iguqula iTheku libe yisizinda esikhulu somnotho, ilethe inzuzo enkulu emahhotela, ezindaweni zokulala, ezindaweni zokudlela, kubahlinzeki bezokuthutha, ezitolo, ezindaweni zezokuvakasha nakubadayisi basemgwaqweni. Lo mcimbi usaqhubeka nokuba ngomunye wemigogodla emikhulu yomnotho ekhalendeni lemicimbi yaminyaka yonke yeDolobha,” kusho iMeya uXaba.
Kulo nyaka kulindeleke ukuthi lo mcimbi uhehe izivakashi ezingaphezu kuka-40 000, kanti imali ezosetshenziswa ngqo ilinganiselwa ku-R230 million. Lo mcimbi kulindeleke futhi ukuthi ufake cishe u-R798 million emnothweni wasekhaya.
Kuphinde kulindeleke ukuthi lo mcimbi weseke amathuba emisebenzi angaba ngu-1 105 ochungechungeni lwawo lwezomnotho.
IMeya uXaba ithe i-Hollywoodbets Durban July iphinde ibe yinkundla ebalulekile yokuthuthukisa umnotho wezobuciko eDolobheni.
“Ngohlelo lweDurban Fashion Fair, sikhulisa isizukulwane esisha sabasunguli bamabhizinisi emfashini. Abaklami abayisishiyagalolunye abasafufusa, abaqede uhlelo lokuqeqeshwa nokwelulekwa lwezinyanga eziyishumi, bazoveza amakhono abo ngeqoqo elihlonishwayo le-DFF Rising Stars Collection esiteji i-Celebration Stage ngesikhathi se-Hollywoodbets Durban July.”
IMeya yengeze yathi:
“Lolu hlelo lunika amandla ithalente lakuleli, luqinisa amabhrendi abo futhi ludala amathuba aqhubekayo okukhula embonini yemfashini, okuqhubeka nokuqinisa isithunzi saseThekwini njengelinye lamadolobha ahamba phambili kwezemfashini.”
IMeya iphinde yagqamisa amalungiselelo abanzi enziwe yiDolobha, ahlanganisa izinhlelo zokuphepha nezokuvikela, ukuphathwa kwezimoto kanye nezinhlelo zokwamukela izivakashi ukuze kuqinisekiswe ukuthi umcimbi uhamba kahle ngaphandle kweziphazamiso.
Sekwenziwe izinhlelo zokusebenza ezibanzi ngokubambisana neminyango kaMasipala, izinhlaka zomthetho nabahleli bomcimbi.
Amaphoyisa kaMasipala kanye nezikhulu zezokulawulwa kwezimoto, ngokubambisana nazo zonke ezinye izinhlaka zomthetho, azoba khona ngobuningi futhi aqaphe kakhulu ngaphakathi nasezindaweni ezizungeze iGreyville kuwo wonke isikhathi somcimbi.
Lo nyaka uphawula iminyaka engu-130 ilandelana kubanjwa lo mjaho omkhulu wamahhashi waseNingizimu Afrika ngaphandle kokuphazamiseka, okuyingqophamlando ekhombisa umlando omude nodumo lwalo mcimbi.
INhloko yeMajor Events, Broadcast and Marketing kwaRace Coast, uStephen Marshall, ithe bayaziqhenya ngokusingatha izindawo zokungenisa izihambeli ezingu-29 ezizimele kanye namatende e-VIP, okuzosekelwa abasebenzi bomcimbi abangaphezu kuka-9 000 kanye nabezokuphepha abangaphezu kuka-1 000.
“Nakuba wonke umnikazi wehhashi, umqeqeshi, umgibeli, umfuyi kanye nomnakekeli wehhashi ephupha ngokuwina umklomelo ka-R10 million we-Hollywoodbets Durban July, lo mcimbi ngesikhathi esifanayo uvula amathuba emikhakheni eminingi, usekela izinkulungwane zemindeni futhi ukhombisa iTheku ezingeni likazwelonke nelamazwe omhlaba,” kusho uMarshall.
IMenenja yeBrand and Communications kwaHollywoodbets, uDevin Heffer, imemezele ukuthi umklomelo womnqobi usukhushulwe waba ngu-R10 million, okwenza i-Hollywoodbets Durban July ibe umjaho wamahhashi ocebe kakhulu e-Afrika.
UHeffer uthe iHollywood Group kanye neRace Coast batshale imali enkulu embonini yomjaho wamahhashi ngokwenza ngcono ingqalasizinda kanye nezindawo zomcimbi.
Lokhu kufaka phakathi ukwakhiwa kwezinkundla ezintsha zokubukela umjaho, ukuthuthukiswa kwendawo yokwethulwa kwamahhashi, ukufakwa kophahla olusha, ukuthuthukiswa kwezinhlelo zomsindo, ukupendwa kabusha kwezindawo, ukufakwa kwamajeneretha kanye nezikrini ezinkulu zedijithali ngenhloso yokwenza izethameli zithole ulwazi olungcono ngesikhathi somcimbi.
Indikimba yalo nyaka ethi “Country Allure” imema abathandi bemfashini, abaklami kanye nabo bonke abazothamela lo mcimbi ukuthi baziveze ngobuhle obuhlanganisa impilo yasemakhaya, ubuhle bendabuko kanye nesitayela sesimanje.
Kulindeleke ukuthi le ndikimba ikhuthaze ubuhlakani obusha obugubha amagugu amasiko kanye nemfashini yesimanje.
Njengoba usuku lomjaho lusondela, izakhamuzi nezivakashi ziyakhuthazwa ukuba zamukele umoya we-Country Allure futhi zibe yingxenye yomgubho ongasoze walibaleka wemfashini, ezokuzijabulisa, umjaho wamahhashi kanye nokungenisa izihambeli ngendlela evelele yaseThekwini.
