Abagijimi be ABSA Run My City bephikelele eMoses Mabhida Stadium
Abahleli bemicimbi nabakhiqizi be-Stillwater Sports, baqinisekise ukuthi umjaho ka-9 waminyaka yonke i-Absa RUN YOUR CITY DURBAN 10K uzoba nomzila oshesha kakhulu ngeSonto mhla ziyi-12 kuNtulikazi 2026. Abagijimi bazophinde bathokozele ukuqala komjaho ngo-07:00 ekuseni, okuyisikhathi esandulelwe uma kuqhathaniswa neminyaka eyedlule.
“I-Absa RUN YOUR CITY DURBAN 10K isilungele ukukhuphula izinga nakakhulu ngo-2026 ngomzila omusha othuthukisiwe futhi oshesha kakhulu, ozovula amathuba okuthi kube nemiphumela esezingeni lomhlaba futhi mhlawumbe kube khona umuntu ogijima i-10km ngaphansi kwemizuzu engama-27 okokuqala ngqa emhlabathini wase-Afrika,” kusho uMichael Meyer, uMqondisi Omkhulu we-Stillwater Sports nomsunguli walolu chungechunge lwemijaho.
Njengoba inkakha yase-Uganda emjahweni wamabanga amade, uJoshua Cheptegei, isiqinisekisiwe ukuthi izobamba iqhaza, kanye neqembu labagijimi besilisa abasezingeni lomhlaba elihlanganisa abaseKenya uFelix Masai (irekhodi lakhe le-10km lingu-27:24) noGilbert Kiprotich (27:43), umnikazi werekhodi likazwelonke laseLesotho uKamohelo Mofolo (27:47), kanye nowaseNingizimu Afrika uKabelo Mulaudzi (27:41), kanti iqembu labesifazane lisazomenyezelwa, lo mzila oshesha kakhulu uqhubeka nokukhulisa amathemba okuthi kuzoba nemiphumela emangalisayo eThekwini ngo-2026. Lokhu kuqinisa isithunzi salo mjaho njengowona omkhulu we-10km emhlabathini wase-Afrika.
“Ukuthuthukisa umzila osevele ushesha akulula neze, kodwa sikwazile ukubona indawo eyodwa lapho bekungathuthukiswa khona ukuze abagijimi bakwazi ukushesha kakhulu,” kuqinisekisa uMeyer. “Lolu shintsho selwenziwe, futhi labo abafuna ukuqopha amarekhodi noma ukuthuthukisa isikhathi sabo bazothola umzila ofanele kakhulu ukwenza lokho.”
Umzila omusha usazohlala uyisicaba kakhulu futhi usheshe, ngaphandle kokukhuphuka okuncane kuphela cishe ku-8km.
“Umzila ka-2026 uklanywe ngokucophelela ukuze usekele ukugijima okusezingeni eliphezulu futhi ngesikhathi esifanayo ukhombise ezinye zezindawo ezidume kakhulu eThekwini, okubalwa kuzo iMoses Mabhida Stadium, i-Inkosi Albert Luthuli International Convention Centre (ICC Durban), iDurban City Hall, ugu lolwandle lwaseThekwini, iSuncoast Casino kanye neSunkist Lawns. Ngo-2026 abagijimi bazophinde bathole ithuba lokubona idolobha ngendlela eyingqayizivele ngesikhathi begijima, futhi babe yingxenye yomjaho ongase ube ngomunye wezikhumbulekayo emlandweni waseThekwini.”
Olunye ushintsho olubalulekile ukuthi isikhathi sokuqala komjaho sesihanjiswe saya ku-07:00 ekuseni, okuyihora elilodwa ngaphambi kwesikhathi esasijwayelekile eminyakeni eyedlule.
Mayelana nalokhu, uMeyer uthe: “Lesi sikhathi esisha senzelwe ukuthi abagijimi bagijime esimweni sezulu esipholile nesikahle. Ngaphezu kwalokho, sizosiza ukunciphisa ukuphazamiseka kubahlali ngeSonto ekuseni, sinciphise isikhathi sokuvinjelwa kwemigwaqo kanye nokuvalwa kwemigwaqo, futhi sisize ukuthi ukuhamba kwezimoto kubuyele esimweni esijwayelekile ngokushesha. Ukuqala kusenesikhathi kuzophinde kunike ababambiqhaza isikhathi esengeziwe sokuchitha eRace Village, lapho bezokwazi khona ukujabulela imigubho yangemva komjaho. Kubo bonke abagijimi, ababukeli kanye nezakhamuzi zaseThekwini, wozani nizosekela futhi nizobona umlando uqoshwa.”
IZINSUKU ZEMIJAHO YE-ABSA RUN YOUR CITY SERIES 2026
1. NgeSonto, 01 Mashi 2026
Absa RUN YOUR CITY GQEBERHA 10K
- Owinile Kwabesilisa: Adriaan Wildschutt (RSA) – 27:47
- Owinile Kwabesifazane: Brenda Jepchirchir (KEN) – 30:15
2. NgeSonto, 10 Nhlaba 2026
Absa RUN YOUR CITY CAPE TOWN 10K
- UMJAHO UKHANSELIWE NGENXA YESIBIKEZELO SEZULU ESIBI
3. NgeSonto, 12 Ntulikazi 2026
Absa RUN YOUR CITY DURBAN 10K – AMATHIKITHI APHELILE
- Indawo Yokuqala: Masabalala Yengwa Avenue (MY)
- Indawo Yokuphetha: Sunkist Lawns, Durban Promenade
4. NgeSonto, 23 Ncwabakazi 2026
Absa RUN YOUR CITY TSHWANE 10K – AMATHIKITHI APHELILE
5. NgoLwesine, 24 Mandulo 2026
Absa RUN YOUR CITY JOBURG 10K
Facebook: @Gqeberha10k / @CapeTown10k / @Durban10k / @Tshwane10k / @Joburg10k
Instagram: @Gqeberha10k / @CapeTown10k / @Durban10k / @Tshwane10k / @Joburg10k
Ama-Hashtag: #RunYourCity #AbsaRunYourCity #Durban10K #JoshuaCheptegei #Greatest10KonAfricanSoil
Ulayini we-WhatsApp: 072 042 7613
Iwebhusayithi: www.runyourcityseries.com
