UNgqongqoshe wezeziMali kuleli uMnu Enock Godongwane
SHEILA MHLONGO
I-South African Social Security Agency (SASSA) yamukele ukukhuphuka kwemali yezibonelelo zikahulumeni okumenyezelwe uNgqongqoshe Wezezimali, u-Enoch Godongwana, ngoLwesithathu.
Zonke izibonelelo zikahulumeni, ngaphandle kwesibonelelo se-COVID-19 Social Relief of Distress (SRD), zizokhuphuka kulo nyaka wezimali ozayo.
Ukukhuphuka kwezibonelelo kuhamba kanje:
- Isibonelelo sabantu asebekhulile sizokhuphuka sisuke ku-R2 315 siye ku-R2 400.
- Isibonelelo samaqhawe empi sizokhuphuka sisuke ku-R2 335 siye ku-R2 420.
- Isibonelelo sabakhubazekile sizokhuphuka sisuke ku-R2 315 siye ku-R2 400.
- Isibonelelo sokunakekela izingane ezikhuliswayo (foster care) sizokhuphuka sisuke ku-R1 250 siye ku-R1 295.
- Isibonelelo sabantwana abadinga ukunakekelwa okukhethekile sizokhuphuka sisuke ku-R2 315 siye ku-R2 400.
- Isibonelelo sokuxhasa izingane sizokhuphuka sisuke ku-R560 siye ku-R580.
- Isibonelelo sokwesekwa (grant-in-aid) sizokhuphuka sisuke ku-R560 siye ku-R580.
Isibonelelo se-SRD sizohlala ku-R370, futhi izinkokhelo zizoqhubeka kuze kube unyaka ozayo.
Isikhulu esiphezulu se-SASSA, uThemba Matlou, sithe siyakwemukela lokhu kumenyezelwa nguNgqongqoshe uGodongwana ngoba izibonelelo zikahulumeni ziyinsika yokuphila kubantu abasengozini enkulu emphakathini.
Uthe lokhu kukhuphuka kwemali kuzosiza abahlomuli ukubhekana nobunzima bezomnotho.
UMatlou uthe lokhu kuphinde kuqinisekise ukuzibophezela kukahulumeni ekunciphiseni ububha nokungalingani emphakathini.
Uphinde wamukela nokuthi isibonelelo se-SRD sizoqhubeka ngendlela esikhona ngayo, wathi sisiza kakhulu abantu abangasebenzi nabasengozini enkulu emphakathini.
“Sisebenza ngokuzikhandla ukuhlanganisa abahlomuli bezibonelelo namathuba omnotho ukuze bakwazi ukuphila ngendlela ezinzile,” kusho uMatlou. – SAnews.gov.za
