UMqondisi Jikelele eHhovisi likaMphathi Dolobha(City Manager) uMnu Sipho Cele ubekhuluma namalunga omphakathi abefike ngobuningi bawo ukuzozizwela mayelana nemiphumela yemingcele yama-wadi , Umhlangano ububanjelwe KwaMashu
SHEILA MHLONGO
IBhodi Elibhekele Ukudidiyelwa Kwemingcele YoMasipala (Municipal Demarcation Board – MDB) seliqede ukubonisana nomphakathi mayelana nemingcele yamawadi ngaphambi kokhetho loHulumeni Bendawo luka-2026, okube nomphumela wokwengezwa kwewadi entsha kuMasipala waseThekwini.
Lokhu kukhuphule inani lamawadi eDolobheni lisuka ku-111 laya ku-112.
Imihlangano yokubonisana ibibanjelwe ezifundeni ezahlukene zedolobha okubalwa kuzo enyakatho, eningizimu, entshonalanga nasenkabeni yeTheku. Iwadi entsha izotholakala esifundeni esisenyakatho yoMasipala.
Njengengxenye yokulungiswa kwemingcele, indawo yaseMophela ekuWard 5 kanye nengxenye yeWard 105 zizofakwa ngaphansi koMasipala waseMkhambathini. Lokhu kuzosebenza ngemva kokhetho loHulumeni Bendawo luka-2026.
Le nqubo eqale ngo-2023 ibihlanganisa ukubuyekezwa kwemingcele yangaphandle yoMasipala kanye nemingcele yangaphakathi yamawadi.
IBhodi le-MDB selidlulisele izinqumo zokugcina zamawadi kuKhomishana Yokhetho Ezimele (IEC). I-IEC kanye noMasipala waseThekwini babe sebeqhuba umjikelezo wokugcina wemihlangano yokubonisana nemiphakathi ethintekayo.
UMqondisi Omkhulu ehhovisi loMphathi weDolobha, uSipho Cele, ugcizelele ukuthi inqubo yokuhlukaniswa kwamawadi kufanele ihambe kahle ukuze kuqinisekiswe ukuthi ukhetho luhamba ngaphandle kwezinkinga. Ubalule nokuthi ukudluliswa kwezimpahla, okubalwa kuzo amathuna abelawulwa uMasipala waseThekwini, kuzohlelwa ngokubambisana noMasipala waseMkhambathini.
Izakhamuzi ezithintekayo ngenxa yokushintshwa kwemingcele zizoxhumana ne-IEC mayelana nezinhlelo eziphathelene nokhetho.
