SHEILA MHLONGO
Ukubamba iqhaza kwabaHoli beNdabuko ekubhekeleni ukuphepha kwemiphakathi yasezindaweni zasemakhaya ngenhloso yokuyivikela ezinhlekeleleni zemvelo kube semqoka kwi-Workshop ebibanjelwe ePinetown Civic Centre, ngomhlaka 19 Febhuwari 2026.
Abaholi bendabuko abavela kuzo zonke izingxenye zase-eThekwini bebehambele iWorkshop yokubaqwashiswa ngobungozi bezinhlekelele zezulu ngenhloso yokuvikela imiphakathi yasemakhaya esengozini enkulu yezikhukhula, iziphepho, imililo nezinye izinhlekelele ezihlobene nokuguquka kwesimo sezulu.
Lo mhlangano, obuhlelwe uMasipala wase-eThekwini, ubuhlose ukuhlomisa abaholi ngamacebo, amathuluzi nolwazi lokulungela izinhlekelele ukuze kuqiniswe ukumelana kwemiphakathi nokuthi kungabikho umuzi oshiywa ngaphandle.
UMeya wase-eThekwini, uKhansela Cyril Xaba,ubehola lomhlangano ekanye nePhini leMeya uZandile Myeni ngokubambisana nabamele iminyango kahulumeni wesifundazwe nezikhungo zokuphathwa kwezinhlekelele, lo mhlangano ugcizelele ukuthi ukunciphisa ubungozi bezinhlekelele akusona isibopho sikahulumeni kuphela.
Kudinga abaholi bendabuko abahlonyiswe ngokuphelele, njengoba izinqumo zabo mayelana nokwabiwa komhlaba, ukuxhumana kwezexwayiso zangaphambi kwesikhathi nokuhlanganisa imiphakathi zithinta ngqo ukuphepha nokusinda kwabantu abahlala ezindaweni zasemakhaya ezisengozini enkulu.
Le ndlela yokusebenza ngokubambisana ikhombisa ukuzibophezela okusha ekwakheni iTheku eliqinile nelikulungele kangconoukubhekana nezinhlekelele.
UMeya uXaba ugcizelele ukuthi izinhlekelele ziyanda futhi ziba zimbi kakhulu, okubeka ingcindezi enkulu kuzingqalasizinda zeDolobha, emnothweni nasempilweni yansuku zonke yabahlali.
“Yonke inhlekelele ishiya umthelela ongemuhle kungqalasizinda yethu, emvelweni yethu, futhi okubuhlungu kakhulu, kubantu bethu. Ngakho-ke, asikwazi ukuhlala silinde kuze kube sekugadla usizi bese siphendula,” kusho uXaba.
UMeya uXaba wengeze ngokuthi inhloso yalolu hlelo bekuwukusuka ekuphenduleni ngemuva kwenhlekelele kuya ekuvinjelweni kwayo kusenesikhathi.
“Ngokuhlomisa abaholi bendabuko bethu ngolwazi olufanele namathuluzi asebenzayo, siqinisa umugqa wokuqala wokuvikela imiphakathi futhi siqinisekisa ukuthi ngokubambisana sithuthukisa amasu azovimbela izinhlekelele ukuthi zingaphinde zibhubhise imiphakathi yasemakhaya,” kusho uMeya uXaba.
Ngesikhathi somhlangano, ochwepheshe bezinhlekelele bakahulumeni wesifundazwe bagcizelele ukubaluleka kokuhlanganisa izinhlelo zolwazi lwendabuko nezindlela zesayensi zokuphatha izinhlekelele.
Abaholi bendabuko bakhuthazwe ukuthi basebenzise izimpawu zemvelo, ulwazi lwabokhokho ngomhlaba kanye nezimpawu zomphakathi zokuxwayisa kusenesikhathi, bahlanganise lokhu nezinhlelo ezisemthethweni zezimo eziphuthumayo ukuze kwakhiwe inethiwekhi yokuphepha eqinile nesebenza ngokushesha.
Omunye wemikhuba ephuthumayo okukhulunywe ngayo kube ukwabiwa komhlaba okungaphephile, okuvame ukubangelwa ukuntuleka kolwazi lokuhlela.
Usihlalo Wabaholi Bendabuko eThekwini, Inkosi Simingaye Mlaba, uthe lo mhlangano uhlomise kangcono abaholi bendabuko ekuthatheni izinqumo ezinolwazi mayelana nokusetshenziswa komhlaba, ekukhipheni izexwayiso zangaphambi kwesikhathi nasekulungiseleleni imiphakathi ngaphambi kokuthi izinhlekelele zenzeke.
“Lo mhlangano awuqinisanga nje, kuphela ubudlelwano bethu noMasipala nezinye izinhlaka, kodwa usisize futhi ekwakheni kabusha ngendlela engcono futhi wasihlomisa ngamathuluzi okuvikela abantu bethu nokufaka isandla ekwakheni iTheku eliqinile nelingenazinhlekelele,” kusho uNkosi Mlaba.
Lo mhlangano unikeze abaholi bendabuko iziqondiso ezisebenzayo zokusetshenziswa komhlaba, ukuqonda imephu yobungozi kanye namasu okuhlala ngokuphepha ukuze kuvinjelwe izinhlekelele zesikhathi esizayo.
