SBU MAMBA
Iqembu laKwaZulu Natal iRichards Bay lijabulise abalandeli litalabha izinsizwa zase
Limpopo iBaroka F.C ngamagoli amane eqandeni emdlalweni wokuhlunga (Play Offs)
obuse King Zwelithini ngolwesithathu. Amagoli eNatal Rich Boys abekwe enethini uLwandile Mabuya ,Sanele Barns kanti amabili ashaywe insizwa engalibheki ipali uSomila Ntsundwana.
IRichards Bay ize kulomdlalo idinga iphuzu elilodwa nje kuphela kodwa indlela ebizimisela ngayo ububona nje ukuthi iBaroka ibhekene nesambane izoyikhotha imbenge yomile , lezinsizwa zase Richards Bay zikhombise kuqala umdlalo ukuthi aziyesabi iBaroka , udonga lwasemuva lweBaroka beluthanda kuba buthakathaka bebehluleka kuvimba amafolosi eRichards Bay anesivinini oSomila Ntsundwana no uYonela Mbuthuma. Kuthe ngomzuzu ka 37 uNtsundwana wabhakuzisa inethi eshaya igoli lokuqala leBay kuthe sekuyophela isiwombe sokuqala wabuya uSanele Barns negoli elihle leBay okube i-free kick ziye ekhefini
iNatal Richboys ihamba phambili ngamagoli amabili eqandeni.
Ngesiwombe sesibili iBaroka izamile ukunyusa amasokisi ifuna amagoli okulinganisa kodwa yadlala ngamathuba . IRichboys iphinde yahlasela ngamandla ngomzuzu ka 62 kwashintsha ngampela ukudla epletini uNtsundwana wavalela enethini igoli lesithathu leBay , kuthe sekuyophela umdlalo yaphinde yalala inkomo isengwa yathola igoli lesine iBay elibekwe enethini uLwandile Mabuya waphela kanjalo umdlalo. Umqeqeshi we Richards Bay uVusumuzi “Kanu” Vilakazi ujabule kakhulu ngokhipha iRichards bay ehlazweni lokuyodlala ehlathini. Lomphumela uchaza ukuthi lezinsizwa zase Bay aziyindawo futhi amaqembu ase KZN agijima ku DSTV azoqhubeka kuba u 4 , okuyi Bay , Amazulu , Golden Arrows nezika MaMkhize iRoyal AM.
