UMasipala waseThekwini ubambisene noMnyango Wezokuthuthukiswa Kwamabhizinisi Amancane ukusingatha uHlelo Lokufinyelela Emphakathini lukaNgqongqoshe eThekwini,
Emizamweni eqhubekayo yokweseka osomabhizinisi bendawo nokwenza kube lula ukuqhuba amabhizinisi, uMasipala waseThekwini ubambisene noMnyango Wezokuthuthukiswa Kwamabhizinisi Amancane ukusingatha uHlelo Lokufinyelela Emphakathini lukaNgqongqoshe eThekwini, mhla ziyi-14 Agasti 2026.
Lolu hlelo oluhlanganyelwe beluholwa nguNgqongqoshe Wezokuthuthukiswa Kwamabhizinisi Amancane, uStella Ndabeni, kanye noKhansela Thembo Ntuli, onguSihlalo weKomidi Lokuthuthukiswa Komnotho Nokuhlela leDolobha.
Lolu hlelo belugxile ekususeni izithiyo zemithethonqubo ngohlelo lokunciphisa izimiso nezinqubo eziyinkimbinkimbi, i-Red Tape Reduction, ngesikhathi kunikezwa nokwesekwa kwezimali okuqondile emabhizinisini anethuba elikhulu lokukhula.
Egcizelela ukubaluleka kokubambisana phakathi kwemikhakha kahulumeni ekwesekeni osomabhizinisi, uNgqongqoshe Ndabeni uthe: “Amabhizinisi amancane asemqoka emizamweni yethu yokwakha amathuba omsebenzi nokuthuthukisa umnotho obandakanya wonke umuntu. Ngezinhlelo ezifana nalezi, uhulumeni akagcini nje ngokuhlonza izithiyo osomabhizinisi ababhekana nazo, kodwa ubuye unikeze usizo olubambekayo olwenza amabhizinisi akwazi ukukhiqiza kangcono, ancintisane futhi akwazi ukusimama.”
Ngaphandle kokubhekana nezithiyo zemithethonqubo, lolu hlelo luphinde lwahlanganisa ukunikezelwa kwempahla ebalulekile okuhloswe ngayo ukuqinisa amandla amabhizinisi endawo.
Ngohlelo i-Asset Assist Programme, osomabhizinisi abancane nabaphakathi abangu-31 bathole imishini yokusebenza ebiza u-R6.3 million. Uhlelo i-Cooperative Development Support Programme lona lwabele imifelandawonye emine yendawo u-R4.6 million. Sekuhlangene, kufakwe imali engu-R10.9 million ohlelweni lokuthuthukisa amabhizinisi amancane eThekwini.
Ephinde waqinisekisa ukuzibophezela kukaMasipala ekukhuliseni amabhizinisi, uKhansela Thembo Ntuli uthe: “Umsebenzi wethu njengeDolobha ukwakha isimo lapho amabhizinisi engakwazi ukusuka ekuzameni ukuphila kuphela, akhule aze akhele nabanye amathuba.
“Ukwesekwa okunikezwe ngalezi zinhlelo kukhombisa lokho okungafezwa uma uhulumeni kazwelonke nowasekhaya besebenzisana ukususa izithiyo, ukuvula izinsiza kanye nokubeka osomabhizinisi eqhulwini ekuthuthukisweni komnotho.”
Ngokuhlanganisa ukuncishiswa kwezithiyo zemithethonqubo nokutshalwa kwezimali okuqondiswe emabhizinisini, uMasipala waseThekwini uyaqhubeka nokwakha isimo esiqinile nesilungele ukuqhuba amabhizinisi. Lokhu kunikeza amabhizinisi endawo amandla okukhula, ukwakha amathuba omsebenzi asimeme kanye nokugqugquzela umnotho obandakanya wonke umuntu esikhathini eside.
