Emcimbini wokwethulwa komkhankaso kubonakala uDkt Viola Morolo, uDkt Sivi Moodley kanye noDkt Cindy Zietsman.-Ithimba laseVictoria Mxenge–St Aidan’s Hospital Tertiary Complex elihlanganisa odokotela, ongoti bokuhlinza nabahlengikazi elihola umzamo wokuqeda uhlu lokulinda ukuhlinzwa.
DURBAN – INyuvesi yaKwaZulu-Natal (UKZN) iphinde yafakazela ukuzibophezela kwayo ekuthuthukiseni usizo lwezempilo ngokuhlinza iziguli ezingu-74 ezazilinde isikhathi eside ukuhlinzwa, njengengxenye yomkhankaso ka-2026 i-African Synergy Health (ASH) Mandela Week Surgical Marathon. Lo mkhankaso uhlose ukunciphisa uhlu lokulinda ukuhlinzwa ezibhedlela zikahulumeni nokubuyisela ithemba ezigulini eziningi.
Odokotela abangongoti bezifo zomchamo (Urology), odokotela abasafundela ubungoti kanye nabahlengikazi base-UKZN basebenzisane nabalingani babo kwezempilo ukuhlinza lezi ziguli ezibhedlela iVictoria Mxenge–St Aidan’s Hospital Tertiary Complex eThekwini kanye neNgwelezana Provincial Tertiary Hospital eMpangeni phakathi komhla ziyisi-6 kuya kumhla ziyi-10 kuNtulikazi.
Lo msebenzi ube negalelo elikhulu emgomweni kazwelonke wokwelapha okungenani iziguli ezingama-200 ngaphambi kokuphela kweNyanga kaMandela.
Ukuhlinzwa okubenzekile kubandakanye ukulungiswa kwezinkinga zokukhubazeka umuntu azalwe nakho, ukwakhiwa kabusha komgudu womchamo (urethra), kanye nokususwa kwezinso noma amasende athinteke umdlavuza. Ezinye iziguli zihlinzwe izikhathi ezingaphezu kwesisodwa ngenxa yobunzima bezimo zazo.
INhloko yoMkhakha Wezifo Zomchamo e-UKZN kanye neNhloko yoMnyango Wezifo Zomchamo KwaZulu-Natal, uDkt Cindy Zietsman, uthe impumelelo yalo mkhankaso ikhombisa amandla okubambisana phakathi kukahulumeni nomkhakha wangasese.
“Ukuhlinza iziguli ezingama-74 ezinsukwini ezinhlanu kuphela kuwubufakazi bokuzinikela kwethimba lethu kanye nomthelela omkhulu ongadalwa ubudlelwano obuqinile phakathi kukahulumeni nabalingani bangasese ekunciphiseni uhlu lokulinda ukuhlinzwa,” kusho uDkt Zietsman.
Uveze ukuthi isidingo sezinsizakalo zobungoti bezifo zomchamo KwaZulu-Natal sisadlula kakhulu amandla akhona. Uthe iziguli ezidinga ukuhlinzwa okuphuthumayo zivamise ukulinda phakathi kwamasonto amabili kuya kwayisishiyagalombili, kanti ezidinga ukuhlinzwa okungesona esiphuthumayo zingalinda kuze kufike ezinyangeni eziyi-12.
Ukuze kuhlangatshezwane nalesi sidingo, izibhedlela zandise izinkundla zokuhlinza ngesikhathi somkhankaso. EVictoria Mxenge–St Aidan’s Hospital Tertiary Complex izinkundla zokuhlinza zikhuliswe zisuka kweziyisithupha zaya kweziyisishiyagalombili, kwathi eNgwelezana Provincial Tertiary Hospital zaphindeka kabili zisuka kwezimbili zaya kwezine.
Lo mkhankaso uqhutshwa ngaphansi kwesivumelwano phakathi kwe-African Synergy Health (ASH) noMnyango Kazwelonke Wezempilo ngenhloso yokuqeda uhlu lokulinda ukuhlinzwa ezibhedlela zikahulumeni eNingizimu Afrika.
UMsunguli kanye neSikhulu Esiphezulu se-ASH, uDkt Viola Morolo, uthe umbono wenhlangano yabo uwukwenza kube khona uhlelo lwezempilo olusebenza kangcono ngokususa ngokuphelele uhlu lokulinda ukuhlinzwa ngokusebenzisa ubudlelwano obuqinile phakathi kwazo zonke izinhlaka.
UDkt Morolo kanye noDkt Marissa Conradie bazinikele ukusebenza ngokuzithandela izinsuku ezintathu phakathi nezinsuku ezinhlanu zomkhankaso, besebenza kanye nodokotela abangongoti abahlanu base-UKZN, odokotela abayisithupha abasafundela ubungoti kanye nabahlengikazi abaningi ezinkundleni zokuhlinza kuzo zombili izibhedlela.
Impumelelo yalo mkhankaso ikhombisa ukukhula okukhulu uma kuqhathaniswa nonyaka odlule. Ngo-2025 kwahlinzwa iziguli ezingama-38 ezenziwa izinqubo zokuhlinza eziyi-118 eVictoria Mxenge–St Aidan’s Hospital kuphela. Kulo nyaka sekulashwe cishe iziguli eziphindwe kabili ezibhedlela ezimbili, okuwuphawu lokuthi lo mkhankaso uyaqhubeka nokwandisa ukufinyelela ezinsizeni zezempilo nokuletha ithemba ezinkulungwaneni zabantu baseNingizimu Afrika.
