ESITHOMBENI: Kungesikhathi kuqeqeshwa amabhizinisi aKwaMashu
SHEILA MHLONGO
Abanikazi bamabhizinisi asezindaweni zasemalokishini KwaMashu ngoMgqibelo womhlaka 15 Agasti bahlonyiswe ngamakhono okuphatha amabhizinisi, ulwazi lokuthola uxhaso lwezimali kanye namathuba okuxhumana nezinkampani ezinkulu. Lokhu kwenzeke ngesikhathi kunohlelo lokuqeqeshwa ngokwethulwa kwemibono yamabhizinisi kanye nomncintiswano wosomabhizinisi obusingathwe wuPhiko Lokuthuthukiswa Komnotho kuMasipala waseThekwini, ngokubambisana ne-Township Entrepreneurs Alliance (TEA).
Lolu hlelo luhlanganise osomabhizinisi bendawo ukuze bakhangise ngezinto ezintsha abazisungulile emiphakathini, baphinde bethule amabhizinisi abo kochwepheshe bezimboni. Abathathu abafinyelele kowamanqamu baklonyeliswe ngemali.
Ochwepheshe bezimboni bahole izigcawu zokucobelelana ngolwazi olubambekayo. Umsunguli weNonkanyiso Funeral Services, uNksz Nonkanyiso Msomi, wethule ukuqeqeshwa okuphelele ngolwazi lokuphathwa kwezimali. Bekugxilwe ekuphathweni kwemali engenayo nephumayo, ekulandeleni imali engenayo kanye nasekukhuliseni ibhizinisi kusetshenziswa imininingwane eqoqiwe.
Umsakazi nodume kwabezindaba, uMnu Linda “Mr Magic” Sibiya, ukhulume nezihambeli ngokubaluleka kobuholi obunombono, ikakhulukazi ngezikhathi lapho amabhizinisi ebhekene nezimo ezinzima.
Lokhu kubambisana kuyingxenye yomsebenzi oqhubekayo kaMasipala wokweseka amabhizinisi asemalokishini asebenza ngokungahlelekile, ukuze akhule abe ngamabhizinisi akulungele ukuthola abatshalizimali. Ngokuxhumanisa amabhizinisi asafufusa asemalokishini nezinkampani ezinkulu, i-TEA ihlose ukuhlanganisa amabhizinisi endawo noxhaxha olusemthethweni lokukhiqiza nokuhlinzeka ngezimpahla.
ISekela leNhloko yoPhiko Lwezolimo, Ukwesekwa Kwamabhizinisi Nezimakethe, uMnu Vuyo Jayiya, lithe uMasipala unesibopho sokweseka izinhlelo ezisiza amabhizinisi amancane ukuthi andise futhi athuthukise ukusebenza kwawo kwansuku zonke.
Umcimbi uphethe ngomncintiswano wosomabhizinisi wokwethula imibono yamabhizinisi, lapho kuklonyeliswe laba abalandelayo:
- Indawo yokuqala (R30 000): USekelo Shude, umsunguli weKuluhlaza Trading.
- Indawo yesibili (R15 000): UWarren Mkhize, umsunguli weMycopro (Pty) Ltd.
- Indawo yesithathu (R10 000): USimo Makhathini, umsunguli weTOFO Tissu.
