ESITHOMBENI -Ingqungquthela Kazwelonke Yaminyaka Yonke ye-SAACI ka-2026 ikhuthaze imboni yemicimbi yezamabhizinisi ukuba ivuselele ukuzibophezela ekusebenzisaneni, ngenhloso yokuqhubekisela phambili ikusasa lomkhakha we-MICE eNingizimu Afrika nokudala umthelela wezomnotho ohlala isikhathi eside.
SHEILA MHLONGO
Ingqungquthela Kazwelonke Yaminyaka Yonke ka-2026 ye-Southern African Association for the Conference Industry (SAACI) iphothulwe ngempumelelo enkulu e-The Capital Zimbali. Le ngqungquthela ihlanganise abaholi bemboni yemicimbi yezamabhizinisi eNingizimu Afrika, yakhombisa ukubaluleka kokusebenzisana nokusungula izinto ezintsha.
Ezinsukwini ezintathu ebezigcwele izinhlelo ezahlukene, izithunywa ziqinise isithunzi seTheku njengendawo ehamba phambili e-Afrika yokusingatha imihlangano, izinhlelo zemiklomelo, izingqungquthela nemibukiso, okubizwa nge-Meetings, Incentives, Conferences and Exhibitions (MICE). Lokhu kwenziwe ngokukhombisa ingqalasizinda esezingeni lomhlaba, ukwamukela izivakashi ngendlela eyingqayizivele kanye nomnotho wezokuvakasha okhulayo.
Izithunywa zithole ithuba lokuzibonela ingqalasizinda yeTheku esezingeni lomhlaba yokusingatha imicimbi yezamabhizinisi, izindawo zokwamukela izivakashi kanye nemikhiqizo yezokuvakasha, ngohlelo obeluhlanganisa izingxoxo zemboni, amathuba okwakha ubudlelwano kanye nezinhlelo zokuvakashela izindawo ezahlukene.
Okugqame kakhulu kube isimemezelo se-Southern Sun Elangeni & Maharani sokuthi izotshala imali engu-R250 million ekulungisweni nasekuvuselelweni kwamahhotela ngezigaba. Lo msebenzi uqale mhla zingama-27 kuNtulikazi 2026.
Eminyakeni emithathu ezayo, imibhoshongo yomibili yamahhotela izoguqulwa ngokwakhiwa kabusha kwamagumbi ezivakashi, ukuthuthukiswa kwezindawo ezisetshenziswa umphakathi kanye nokwenza ngcono izinsiza. Lokhu kuzophinde kuqinise umkhakha wezokuvakasha nowokwamukela izivakashi eThekwini.
Ephawula ngale ngqungquthela, iPhini leNhloko yezokuVakasha eThekwini, uWinile Mntungwa, uthe:
“Izingqungquthela ezifana nalezi zinamandla amakhulu okukhuthaza utshalomali, ukukhulisa ezokuvakasha, ukusungula izinto ezintsha nokudala amathuba emisebenzi. Siyaziqhenya ngokuthi sikwazile ukukhombisa indlela esezingeni eliphezulu iTheku elamukela ngayo izivakashi kanye namathuba alo okusingatha imicimbi yezamabhizinisi. Siyajabula nangokuqhubeka kokutshalwa kwezimali ngabalingani abafana ne-Southern Sun.”
UMntungwa ugcizelele ukuzibophezela kweDolobha ekuqiniseni isikhundla seTheku njengendawo ehamba phambili e-Afrika ekusingatheni imihlangano, izinhlelo zemiklomelo, izingqungquthela nemibukiso.
Ingqungquthela iphothulwe ngokuthi ababambiqhaza bemboni bavuselele isifungo sabo sokuqhubeka nokwakha ubudlelwano, ukusungula izinto ezintsha kanye nokukhulisa imboni yemicimbi yezamabhizinisi eNingizimu Afrika.
