ESITHOMBENI-IMeya kaMasipala waseThekwini, uKhansela Cyril Xaba, ihambisana namalungu eKomidi Eliphezulu uKhansela Thembo Ntuli, uKhansela Zama Sokhabase, uKhansela Themba Mvubu kanye noKhansela Sifiso Mkhize, ngesikhathi bevula ngokusemthethweni imiklamo ebalulekile yokulethwa kwezidingo zomphakathi ebiza izigidi zamarandi ezindaweni ezisentshonalanga ekude yeDolobha mhla zingama-23 kuNtulikazi. Izithombe: Thuli Dlamini
SHEILA MHLONGO
Ubuholi bukaMasipala weTheku obuholwa yiMeya uKhansela Cyril Xaba, bethule ngokusemthethweni imiklamo eminingi yokulethwa kwezidingo zomphakathi ebiza izigidi zamarandi entshonalanga yeTheku mhla zingama-23 kuJulayi.
IMeya ibihambisana namalungu eKomidi Eliphezulu kanye namakhansela, okubalwa kuwo uKhansela Thembo Ntuli, uKhansela Zama Sokhabase, uKhansela Themba Mvubu kanye noKhansela Sifiso Mkhize.
Uhlelo luphethwe ngomhlangano wokuxoxisana nomphakathi, obuhanjelwe yizinkulungwane zezakhamuzi zaseKwaNyuswa, KwaNgcolosi, eMbo nasezindaweni ezizungezile.
Ekhuluma nezakhamuzi, iMeya uXaba igcizelele ukuzibophezela kukaMasipala ekwandiseni iDamu Lokugcina Amanzi laseKwaNqetho ukuze lihlangabezane nezidingo ezikhulayo zomphakathi.
“Leli damu landisiwe lisuka ekubeni namandla okugcina imegalitha elilodwa lamanzi, ngemva kokuba ucwaningo olwenziwa ngowezi-2021 luveze ukuthi isibalo sabantu baseKwaNgcolosi sase sikhule ngemizi eyengeziwe eyizi-2 500. Ngakho-ke uMasipala wathatha isinqumo sokwandisa amandla aleli damu ukuze likwazi ukugcina amamegalitha ayisithupha amanzi,” kusho yena.
IMeya uXaba iphinde yamemezela izinhlelo zokwakhiwa kwedamu elisha lokugcina amanzi KwaNyuswa, lapho ukuhlinzekwa kwamanzi okuphazamiseka njalo kusalokhu kuyinselelo. Indawo efanele yokwakhiwa kwalo mklamo isihlonziwe.
“NjengeDolobha, siyaqhubeka nokutshala imali kwingqalasizinda yamanzi ukuze sizinze ukuhlinzekwa kwamanzi emiphakathini yasemadolobheni neyasemakhaya, ngenhloso yokuqinisekisa ukuthi akekho osala ngaphandle,” kusho iMeya.
Mayelana nengqalasizinda yemigwaqo, iMeya uXaba iveze ukuthi uMasipala usuwakhe imigwaqo eyisithupha engenela emiphakathini yaKwaNyuswa naseMaphephetheni. Lokhu kubandakanya nokulungiswa kwemigwaqo eyalimala ngesikhathi sezikhukhula ezadala umonakalo omkhulu ngowezi-2022.
KUPHELA
Ikhishwe wuPhiko Lwezokumaketha Nezokuxhumana lukaMasipala waseThekwini. Ukuze uthole eminye imininingwane, ungaxhumana noMkhulumeli weMeya, uMluleki Mntungwa, ku-060 974 1140.
Le miklamo ibandakanya iDamu Lokugcina Amanzi laseKwaNqetho elibiza izigidi ezingama-R40, elandiswe lisuka ekuthwaleni imegalitha elilodwa lamanzi laya kumamegalitha ayisithupha; uMgwaqo uQhuzwini obiza izigidi eziyisi-R6, othuthukiswe wasuswa ekubeni ngumgwaqo owubhuqu wafakwa itiyela; kanye nokunikezelwa kwezindlu eziningana kubahlomuli.
Lokhu kulandelwe wumhlangano wokuxoxisana nomphakathi obubanjelwe eNkundleni Yezemidlalo yaKwaNyuswa.
Top of Form
Bottom of Form
