Isihloko sesithombe: IMeya kaMasipala waseThekwini, uKhansela Cyril Xaba, kanye noSihlalo weKomidi Lezohwebo Nezinsizakalo (Trading Services Portfolio Committee), uKhansela Mduduzi Nkosi, bethula namuhla umkhumbi wezimoto ezintsha zokulawulwa kwemfucuza obiza u-R43 million.–Izithombe: Enos Mhlongo
SHEILA MHLONGO
UMasipala waseThekwini usuqinise amandla awo ekulethweni kwezidingo zokulawulwa kwemfucuza ngokwethula iqoqo lezimoto ezintsha zokusebenza ezibiza u-R43 million, ozosetshenziswa uPhiko Lokulawulwa Kwemfucuza (Waste Management Directorate).
Lezi zimoto zethulwe ngokusemthethweni ngoLwesine lomhlaka 6 Agasti yiMeya kaMasipala weTheku, uKhansela Cyril Xaba, othe lolu tshalomali lukhombisa ukuzibophezela kukaMasipala ekuthuthukiseni ukulethwa kwezidingo ngokuhlomisa abasebenzi abasebenza ngqo emiphakathini ngezinsiza zesimanje, ezinokwethenjelwa nezifanele umsebenzi.
Izimoto ezintsha eziyi-18 ezithengiwe zihlanganisa:
- Izimoto zokucindezela nokuqoqa udoti (refuse compactors)
- Izimoto ezinkulu zezimboni zokucindezela udoti (industrial refuse compactors)
- Izimoto zezinsizakalo (service wagons)
- Izimoto zokushanela imigwaqo (street sweepers)
- Amaveni (bakkies)
- Izimoto zamabhokisi (box trucks)
Lezi zimoto zizosatshalaliswa ezindaweni ezahlukene kulo lonke idolobha ukuze kuthuthukiswe ukuqoqwa kukadoti, kuqiniswe umsebenzi wokushanela imigwaqo, kusekelwe ukunakekelwa nokulungiswa kwezimoto, kuncishiswe isikhathi lapho umsebenzi umiswa khona ngenxa yemishini esigugile, kuphinde kusheshiswe ukubhekelelwa kwezicelo zomphakathi eziphathelene nokulethwa kwezidingo.
Ukufakwa kwalezi zimoto emsebenzini kungeminye yemiphumela yokuqala ebonakalayo yoHlelo Lokuthuthukisa Izinguquko Lwezinsizakalo ZeMetro (Metro Trading Services Reform Improvement Plan) loPhiko Lokulawulwa Kwemfucuza. Lolu hlelo luhlose ukuguqula lolu phiko lube wuphiko lukamasipala lwesimanje, oluzinzile ngokwezimali nolusebenza ngendlela ephumelelayo.
Ukwethulwa kwalezi zimoto kukhombisa ukuthi uhlelo lwezinguquko selusukile esigabeni sokuhlela, lwangena esigabeni sokusebenza.
Ekhuluma ngesikhathi kwethulwa lezi zimoto, uXaba uthe lolu tshalomali lukhombisa ukuzimisela kweDolobha ukwakha idolobha elihlanzekile, elinempilo neliyindawo engcono yokuhlala.
“Ukuthengwa kwalezi zimoto ezintsha kuwubufakazi obusobala bokuzibophezela kweDolobha ekuthuthukiseni ukulethwa kwezidingo nokuqinisekisa ukuthi imiphakathi yethu ithola izinsizakalo zokulawulwa kwemfucuza ezinokwethenjelwa nezisebenza ngempumelelo.
“Ukuba nezimoto ezihlome kahle kwenza amathimba ethu akwazi ukubhekana kangcono nezidingo zabahlali, agcine izindawo zomphakathi zihlanzekile futhi afake isandla ekwakheni indawo enempilo kubo bonke,” kusho uXaba.
Uqhube wathi ukutshala imali ezinsizeni zesimanje zokusebenza kubalulekile ukuze kuhlangatshezwane nezidingo zedolobha elikhula ngesivinini.
“Njengoba iTheku liqhubeka nokukhula, kanjalo nesidingo sezinsizakalo ezibalulekile zikamasipala siyaqhubeka nokwanda.
“Lezi zimoto ezintsha zizothuthukisa ukusebenza kahle, zinciphise ukuphazamiseka kwemisebenzi okubangelwa yimishini esigugile futhi zisekele ukuzibophezela kwethu ekuletheni izinsizakalo ezisezingeni eliphezulu kuyo yonke imiphakathi.
“Ekugcineni, lolu tshalomali lumayelana nokwenza ngcono izinga lempilo yabahlali bethu kanye nokwakha idolobha sonke esingaziqhenya ngalo,” kusho uXaba.
