USiyanda Mwelase uqokwe njengoMqondisi woPhiko lwezaManzi nokuThuthwa kweNdle
UMasipala waseThekwini usuqoke uSiyanda Mwelase njengoMqondisi woPhiko lwezaManzi nokuThuthwa kweNdle, kusukela mhla lu-1 kuAgasti 2026.
UMwelase uthatha lesi sikhundla ngesikhathi iDolobha liqala uhlelo loMgcinimafa kaZwelonke i-Metro Trading Services Reform, okuwuhlelo olugunyazwe yiKhabhinethi oluxhumanisa uxhaso lwezingqalasizinda nentuthuko elinganisekayo ekuhlinzekweni kwamanzi, ukuthuthwa kwendle, ugesi kanye nokuthuthwa kukadoti.
Ukuqokwa kukaMwelase kuyigxathu elibalulekile ekuzibophezeleni kukaMasipala ekwakheni uhlelo lwezamanzi nokuthuthwa kwendle oluzinzile ngokwezimali, olubeka amakhasimende phambili futhi olukwazi ukumelana nezinselelo.
Lezi zinguquko zihlose ukuqinisa ukusimama kwezimali kanye nokusebenza kwezinsizakalo zikaMasipala ezidayiswayo, ngokwenza ngcono ukuphatha, ukuqinisa ukuziphendulela, ukuthuthukisa ukusebenza kahle kanye nokuqinisekisa ukuhlinzekwa kwezinsizakalo zamanzi nokuthuthwa kwendle ezithembekile nezisimeme kubahlali baseThekwini.
UMnu Mwelase, ongunjiniyela wezokwakha obhalisiwe, uneziqu ze-Master of Business Administration (MBA), kanti uneminyaka engaphezu kwengama-25 yesipiliyoni emkhakheni wezamanzi kanye nengqalasizinda. Ulwazi lwakhe olunzulu kwezobuchwepheshe luhambisana nesipiliyoni esikhulu ekuphathweni kwezamabhizinisi.
Ekwamukela ukuqokwa kwakhe, iMenenja yeDolobha, uMnu Musa Mbhele, ithe iDolobha linethemba lokuthi ubuholi bukaMnu Mwelase buzobamba iqhaza elikhulu ekuqhubekiseni uguquko oPhikweni lwezaManzi nokuThuthwa kweNdle.
“Ukuqokwa kukaSiyanda Mwelase kuza ngesikhathi esibucayi lapho iDolobha lisheshisa imizamo yokwenza ngcono ukwethembeka, ukusebenza kahle kanye nokusimama kwengqalasizinda yezamanzi nokuthuthwa kwendle. Isipiliyoni sakhe nobuholi bakhe obunamasu kuzosiza ukusheshisa izinhlelo zethu zokulungisa isimo, kuqinise ukulethwa kwezidingo futhi kusekele ukuzibophezela kweDolobha ekuhlinzekeni izakhamuzi ngezinsizakalo zamanzi nokuthuthwa kwendle ezithembekile nezikwazi ukumelana nezinselelo,” kusho uMbhele.
Ezwakalisa ukubonga ngaleli thuba, uMnu Mwelase uthe uzizwa ehloniphekile ngokujoyina uMasipala kulesi sigaba esibaluleke kangaka sohambo lwawo lokuvuselela nokuguqula ukusebenza kwawo.
“Ngizizwa ngihloniphekile futhi ngijabule ngokujoyina uMasipala waseThekwini kulesi sikhathi esibaluleke kangaka ohambweni lwawo lokuvuselela nokuguqula ukusebenza. Ngizibophezele ngokuphelele ekuqhubekiseni phambili i-Vision 2030 yeDolobha kanye nokubamba iqhaza ekuvuselelweni okuqhubekayo kukaMasipala ngokuhlinzeka ngezinsizakalo zamanzi nokuthuthwa kwendle ezisimeme nezisebenzisa izindlela ezintsha,” kusho uMnu Mwelase.
Uthe ubheke ngabomvu ukusebenzisana nabasebenzi, ababambiqhaza kanye nemiphakathi ukuze kuqiniswe ukulethwa kwezidingo futhi kuthuthukiswe ukusebenza koPhiko.
