IMeya yaseThekwini, uKhansela Cyril Xaba, ihola umkhankaso oqinile wokubhekana nokuvuza kwamanzi njengoba uMasipala usuphumelele ukwehlisa ngo-70% isibalo sezigameko zokuvuza kwamanzi ezibikiwe.
SHEILA MHLONGO
Isibalo sezinkinga zamanzi ezibikiwe kulo lonke iDolobha sehle sisuka ku-13 000 ngoNtulikazi 2026 saya ku-3 900, ngemuva kokuba amathimba kaMasipala abhekele ukusebenza kwamanzi elungise ngempumelelo izindawo ezivuza amanzi ezingaphezu kuka-9 000.
Le nqubekela phambili enkulu ilandela ukuxazululwa kwezinselelo zokusebenza ezaziphazamisa osonkontileka bamapayipi bakaMasipala. Lokhu kuyingxenye ebalulekile yesu likaMasipala lokuzinzisa ukuhlinzekwa kwamanzi nokunciphisa ukulahleka kwawo.
Ngaphezu kokunciphisa umsebenzi wokulungisa owawusalele emuva, uMasipala usunciphise namanzi angangenisi mali — okungamanzi akhiqiziwe kodwa alahleka ngenxa yokuvuza kwamapayipi, ukuqhuma kwawo, ukwebiwa kwamanzi kanye nokuxhunywa kwamanzi ngokungemthetho — esuka ku-58% aya ku-55%.
IDolobha lihlose ukwehlisa lesi sibalo sibe ngaphansi kuka-50% ngaphambi kokuphela konyaka.
IMeya uCyril Xaba ithe ukwehla kwesibalo sezindawo ezivuza amanzi sisuka ku-13 000 saya ku-3 900 kukhombisa ukuthi amathimba kaMasipala angakwazi ukufeza lukhulu uma umsebenzi wawo wesekwa ngendlela efanele.
“Yize senza inqubekela phambili eqhubekayo, asikafiki lapho sifuna ukuba khona. Sisagxile ekuvaleni zonke izindawo ezisavuza kanye nasekwehliseni amanzi angangenisi mali abe ngaphansi kuka-50%.
“Ilitha ngalinye lamanzi elilahleka ngenxa yokucekelwa phansi kwengqalasizinda nokuxhunywa kwamanzi ngokungemthetho lingamanzi asuke ephucwe izakhamuzi. Sicela imiphakathi ibambisane nathi ekuvikeleni le ngqalasizinda,” kusho uXaba.
IMEYA IHAMBELA IZINDAWO EZINENKINGA
Kusukela ngenyanga edlule, iMeya isiqinise ukungenelela kwayo ezinkingeni zamanzi nendle, ihambela izindawo ezihlonzwe njengezinezibalo eziphezulu zokuvuza kwamanzi nokuchitheka kwendle.
IMeya isivele ihambele KwaMashu, ePhoenix, eWentworth, eMerewent, eMerebank, e-Austerville naseLamont, lapho iyalele khona amathimba ukuthi aphuthumise ukulungisa izinkinga ezihlonziwe.
NgoLwesithathu, iMeya izoqhubekisela lolu hlelo eMlazi, lapho izohlola khona izindawo ezinenkinga ikanye namathimba amanzi nokuthuthwa kwendle. Izophinde yengamele imizamo yokulungisa ukuvuza kwamanzi nokubhekana nokuchitheka kwendle.
UKUCEKELWA PHANSI KWENGQALASIZINDA KUYINSELELO ENKULU
Enye yezinselelo ezinkulu ezihlonzwe ezindaweni eziningi wukuqhubeka kokucekelwa phansi kwamapayipi amanzi nengqalasizinda yomphakathi, kanye nokuxhunywa kwamanzi ngokungemthetho.
Lezi zenzo zifaka ingcindezi enkulu ohlelweni lokuhlinzekwa kwamanzi, ziphazamise ukutholakala kwamanzi okuthembekile emiphakathini futhi zibe nomthelela ekwandeni kwamanzi alahlekayo angangenisi mali kuMasipala.
Izakhamuzi ziyanxuswa ukuba zibike ukuvuza kwamanzi, ukuqhuma kwamapayipi, ukucekelwa phansi kwengqalasizinda kanye nokuxhunywa kwamanzi ngokungemthetho.
Ukubika komphakathi kusiza amathimba kaMasipala ukuba aphendule ngokushesha ezinkingeni, kuphinde kusize abomthetho ukuthi babhekane nalabo abathintekayo ezenzweni zobugebengu.
BIKA IZINKINGA ZAMANZI:
📱 eThekwini Municipality Mobile App
💬 WhatsApp: 073 1483 477
📞 Inombolo yamahhala: 080 311 1111
✉️ Email: Eservices@durban.gov.za
UMTHOMBO -eThekwini Municipality Marketing and Communications Directorate
