ISITHOMBE: IMeya yeTheku, uKhansela Cyril Xaba, ichaze namuhla ukuthi iDolobha likulungele ukusingatha umdlalo wamanqamujuqu we-MTN8 phakathi kwe-Orlando Pirates neMamelodi Sundowns eMoses Mabhida Stadium ngoMgqibelo, mhla ziyi-10 kuMfumfu 2026.
Umthombo: Uphiko lweZokumaketha nokuXhumana lukaMasipala weTheku.
SHEILA MHLONGO
IMeya kaMasipala weTheku, uKhansela Cyril Xaba, isamukele isinqumo sePremier Soccer League (PSL) sokuba umdlalo wamanqamujuqu we-MTN8 ka-2026, phakathi kwe-Orlando Pirates neMamelodi Sundowns, udlalelwe eMoses Mabhida Stadium ngoMgqibelo, mhla ziyi-10 Okthoba 2026.
Ekhuluma esithangamini nabezindaba eMoses Mabhida Stadium namuhla, uXaba uthe lesi sinqumo sikhombisa umlando wale nkundla wokusingatha imidlalo emikhulu yebhola, kanye neqhaza layo ekwenzeni iTheku libe yindawo ekhethwayo ukusingatha imicimbi emikhulu yezemidlalo.
Uthe ngenxa yalolu lwazi nomlando, uMasipala unesiqiniseko sokuthi ukulungele ukusingatha lo mdlalo.
“IDolobha likulungele ukusingatha umdlalo wamanqamujuqu we-MTN8 ka-2026 eMoses Mabhida Stadium. Sisebenzisana eduze ne-PSL, abaphathi benkundla, abomthetho, abezimo eziphuthumayo nabanye abathintekayo ukuqinisekisa ukuthi zonke izinhlelo ezidingekayo ziyaphothulwa ngaphambi kosuku lomdlalo,” kusho uXaba.
Uthe kulindeleke ukuthi lo mdlalo uhehe abalandeli nezivakashi ezivela ezindaweni ezahlukene zezwe. Lokhu kuzovulela amathuba amabhizinisi endawo, abahwebi, amabhizinisi amancane, amahhotela nezinye izindawo zokungenisa izivakashi, abezokuthutha kanye nabasembonini yezobuciko.
UXaba uphinde wagcizelela amathuba ezokuvakasha nezomnotho ahambisana nokusingathwa kwemicimbi emikhulu yezemidlalo. Uthe izivakashi zizokwazi ukujabulela izindawo zokuvakasha zaseThekwini, amabhishi, izindawo zokudlela nezindawo zokuhlala.
“IMoses Mabhida Stadium ingaphezu kokuba yinkundla. Isiyingxenye yobunjalo beDolobha futhi iyaqhubeka nokuheha imicimbi emikhulu yezemidlalo eThekwini. Sibheke ngabomvu umdlalo othokozisayo mhla ziyi-10 kuMfumfu nokwamukela abalandeli bebhola eDolobheni lethu,” kusho uXaba.
IMeya inxuse abalandeli abazohambela eThekwini ukuba bahlele uhambo lwabo kusenesikhathi, basebenzise izithuthi zomphakathi lapho kungenzeka khona futhi balandele imiyalelo yezikhulu ukuze usuku lomdlalo luphephe futhi lujabulise.UMasipala usaqhubeka nokusebenzisana ne-PSL, abaphathi benkundla nabanye abathintekayo ukuhlela kahle umsebenzi wosuku lomdlalo, kubhekwe nesibalo esikhulu sabalandeli nezivakashi okulindel
