Isithombe:IKomidi lezokuThuthukiswa koMnotho nokuHlela kuMasipala waseThekwini, eliholwa nguKhansela Thembo Ntuli, lihlangane ukudingida izinhlelo ezibalulekile okuhloswe ngazo ukukhulisa umnotho wendawo.
SHEILA MHLONGO
IKomidi lezokuThuthukiswa koMnotho nokuHlela kuMasipala waseThekwini (ECOD) ligunyaze izinhlelo ezinkulu okuhloswe ngazo ukuheha utshalomali lwezigidigidi zamarandi oluvela ezinkampanini ezizimele, ukukhuthaza intuthuko yezindawo kanye nokwandisa imali engenayo kuMasipala ngezintela zezakhiwo.
Nokho, zonke lezi zinhlelo ezigunyazwe yikomidi kusamele zithole imvume yeKomidi eliPhethe (EXCO), bese zigcina sezigunyazwa uMkhandlu ogcwele.
Enye yezinhlelo eziphambili yi-Economic Development Incentive Policy (EDIP), ehlinzeka izinkampani ezinkulu ezitshala imali eThekwini ngezaphulelo zezintela zezakhiwo isikhathi esingafinyelela eminyakeni emithathu.
UMasipala uthi lolu hlelo luhambisana notshalomali olulinganiselwa ku-R1.966 billion oluvela emkhakheni ozimele, oluzothuthukisa izimboni nengqalasizinda emikhakheni eyahlukene.
Izindlu ezingaphezu kuka-2 600 eCornubia
IKomidi ligunyaze izinguquko eziphathelene nokusetshenziswa komhlaba ngaphansi kwe-Special Zone 20 eCornubia. Lokhu kuhloswe ngakho ukusiza ekuvuleni indlela yokwakhiwa kwezindlu ezixubile ezilinganiselwa ku-2 601.
Kuphinde kwagunyazwa ukuthi iMenenja yeDolobha isayine isivumelwano i-Traditional Rural Spatial Framework Memorandum of Understanding (MoU), kanye nezivumelwano zokuhlinzekwa kwezidingo namaKhandlu oMdabu angu-18.
Lokhu kuhloswe ngakho ukwenza kube nokusebenzisana phakathi kukaMasipala nobuholi bendabuko ekuhleleni nasekuphathweni komhlaba ezindaweni zasemakhaya.
R600 million embonini yensimbi
I-Alpine Group (IKPSA-AASM) ihlela ukutshala imali engu-R600 million ekwakhiweni kwendawo enkulu yokukhiqiza nokucubungula insimbi eduze kweTheku laseDurban.
Lolu tshalomali luzosekelwa ngesaphulelo esingu-100% sentela yezakhiwo ngaphansi kohlelo lwezikhuthazo lukaMasipala.
Ngakolunye uhlangothi, i-Ogihara South Africa ihlela ukutshala imali elinganiselwa ku-R250 million embonini yokukhiqiza izinsiza ezisetshenziswa ezimotweni ngaphakathi kwe-Dube TradePort Special Economic Zone.
Le nkampani izothola isaphulelo sentela yezakhiwo esingu-80%, kanti iphrojekthi kulindeleke ukuthi idale imisebenzi yesikhathi esigcwele engu-220.
R780 million yezindawo zokuhlala abafundi
IGrowthpoint Student Accommodation Holdings ihlela ukutshala u-R780 million ekwakhiweni kwezindawo zokuhlala ezizokwazi ukuhlalisa abafundi abangu-2 300 eduze kwe-University of KwaZulu-Natal (UKZN) Gate 1.
Le phrojekthi izothola isaphulelo sentela yezakhiwo esingu-50%. Kulindeleke ukuthi isize ekunciphiseni ukushoda kwezindawo zokuhlala abafundi iphinde ikhuthaze ukuthuthukiswa kwendawo.
Inxanxathela yezitolo e-Inanda
Inkampani i-Newlistar (Pty) Ltd ihlela ukutshala u-R200 million ekwakheni indawo yesimanje yezitolo e-Nozaza Junction, e-Inanda.
Le phrojekthi izothola isaphulelo sentela yezakhiwo esingu-50%, kanti uMasipala uthi izosekela imisebenzi elinganiselwa ku-562 ngenyanga ngesikhathi sokusebenza nokwakhiwa kwayo.
ENyakatho yeTheku, i-Sibaya Node 5 nayo izothola isaphulelo esingu-50% ukuze kuqhutshekwe nephrojekthi entsha yezitolo ebiza u-R136 million ngaphakathi kwe-Sibaya Coastal Precinct.
Kuvulwa amathuba entuthuko eRidgeside
IKomidi liphinde lagunyaza izinguquko ku-Ridgeside Sub-Scheme, ezizovumela ukuthi kuhlelwe kabusha indawo engu-6 000 square metres ebekelwe amabhizinisi kanye nezindlu ezingu-370 phakathi kwezindawo ezahlukene.
UMasipala uthi lokhu kuzosiza ukuvula amathuba entuthuko abengasetshenziswa futhi kwandise imali engenayo ngezintela zezakhiwo.
R2.5 million ukusiza amabhizinisi abesifazane nentsha
IKomidi liphinde lagunyaza isivumelwano nenhlangano i-Asime Women NPC sokusebenzisa uxhaso luka-R2 526 250 oluvela kwa-FoodBev SETA.
Le mali izosetshenziswa ohlelweni lwezinyanga ezingu-12 oluzosiza amabhizinisi ezolimo angu-55 aholwa ngabesifazane nentsha.
Osomabhizinisi bazothola ukuqeqeshwa nokwesekwa ekugcinweni kwamabhuku ezimali, ekulandeleni imithetho edingekayo kanye nasekutholeni amathuba okungena ezimakethe ezinkulu.
Imithetho emisha yokweseka umnotho wasemalokishini
IKomidi selidlulisele i-Retail Markets First Amendment By-law 2026 kanye ne-Informal Trade Third Amendment By-law 2026 esigabeni sokubonisana nomphakathi izinsuku ezingu-30.
Lezi zinguquko kuhloswe ngazo ukunciphisa izithiyo zemithetho kosomabhizinisi abancane, ukudala izindawo ezibekelwe amabhizinisi amancane nokuvikela abadayisi abasemgwaqweni kanye namanye amabhizinisi angakahleleki.
UMasipala uthi ukuhlanganiswa kwezaphulelo zezintela, ukuhlelwa kokusetshenziswa komhlaba, ukuthuthukiswa kwengqalasizinda kanye nokuvuselelwa kwemithetho kuhloswe ngakho ukwenza iTheku libe indawo eheha kakhulu abatshalizimali.
Kulindeleke ukuthi lokhu kukhuthaze ukwakhiwa kwamathuba emisebenzi, kuhehe olunye utshalomali futhi kwandise imali engenayo kuMasipala esikhathini eside.
IKomidi lithi ukubeka phambili ukuhlelwa kwezindawo, ukuvikelwa kwemvelo, ukuthuthukiswa kwamabhizinisi kanye nokwesekwa kwamabhizinisi amancane, amancane kakhulu naphakathi nendawo (MSMEs), kuyingxenye yemizamo yokuthuthukisa imiphakathi nokwenza iDurban ibe ngelinye lamadolobha ancintisana namanye emhlabeni.
Umthombo: eThekwini Municipality Marketing and Communications Directorate
