UMasipala weTheku uyaqhubeka nokuqinisa amandla awo angaphakathi ngokubuyisela ngaphansi kwawo izinsiza ezibalulekile. Kusukela ngonyaka odlule, uMasipala uthathe izinyathelo zokuthi izinsiza zamaloli athutha amanzi zingabe zisakhishwa zinikezwe izinkampani zangaphandle, kodwa zenziwe nguMasipala uqobo
SHEILA MHLONGO
Kuze kube manje, sekutshalwe imali elinganiselwa ku-R345 million ekuthengeni amaloli amanzi nasekubuyiseleni le nsizakalo ngaphansi kukaMasipala.
Njengamanje uMasipala unemikhumbi yamaloli amanzi angu-318 asebenzayo. Kulindeleke ukuthi kuthengwe amanye amaloli angu-43 ngaphambi kokuphela kwalo nyaka, okuzokwenza isibalo samaloli kaMasipala sifinyelele ku-361.
Lokhu kulindeleke ukuthi kuqinise kakhulu amandla kaMasipala okubhekana nezinkinga zokuphazamiseka kwamanzi emiphakathini, ikakhulukazi ezindaweni lapho ingqalasizinda yamanzi isantula khona.
IMeya kaMasipala weTheku, uKhansela Cyril Xaba, iphinde yagcizelela ukuthi amaloli amanzi ayisixazululo sesikhashana kuphela. Inhloso yesikhathi eside kaMasipala ukuqinisekisa ukuthi izakhamuzi zithola amanzi athembekile ngompompi basemakhaya azo.
Njengoba uMasipala uqhubeka namaphrojekthi ahlukahlukene okuthuthukisa nokusimamisa ukuhlinzekwa kwamanzi, ikakhulukazi ezindaweni zasemakhaya, amaloli amanzi azoqhubeka nokudlala indima ebalulekile ekuqinisekiseni ukuthi zonke izakhamuzi ziyawathola amanzi okuphuza ahlanzekile.
“Amaloli amanzi ayisixazululo sesikhashana emiphakathini ebhekene nokushoda kwamanzi ngesikhathi iDolobha liqhubeka nokuthuthukisa ingqalasizinda nokwandisa ukuhlinzekwa kwamanzi kulo lonke iTheku. Emva kokubona ukuthi uMasipala usebenzisa imali enkulu ngokukhiphela le nsizakalo ezinkampanini zangaphandle, sanquma ukuthenga awethu amaloli nokuqasha abashayeli abengeziwe ukuze siqinisekise ukuthi le nsizakalo isebenza ngendlela efanele,” kusho uXaba.
UXaba uthe lesi sinyathelo siphinde sasiza uMasipala ekulweni nezenzo ezingalungile ezazihlotshaniswa nokukhishelwa kwale nsizakalo ezinkampanini zangaphandle, kulandela izinsolo zokuthi ingqalasizinda yamanzi kaMasipala yayiphazanyiswa ngamabomu.
IMeya yengeze ngokuthi ukwandiswa kwesibalo samaloli amanzi kuzoqinisa amandla kaMasipala okuhlinzeka ngezinsiza ezibalulekile emiphakathini, kuphinde kunciphise isikhathi sokuphendula uma kunezinkinga zamanzi ukuze usizo lufinyelele kubahlali ngokushesha.
UMasipala weTheku uthi usazibophezele ekuqiniseni amandla awo angaphakathi, ukuthuthukisa ukuhlinzekwa kwezidingo zomphakathi kanye nokutshala imali ezixazululweni zesikhathi eside zokubhekana nezinselelo zokutholakala kwamanzi kulo lonke iTheku.
UMTHOMBO :uPhiko lwezokuMaketha nokuXhumana kuMasipala weTheku.
