UMasipala weTheku uyaqhubeka nokubuyisela esimweni esifanele izindawo zomphakathi ezisenkabeni yeDolobha ngemikhankaso ebanjwa masonto onke
SHEILA MHLONGO
UMasipala weTheku uyaqhubeka nokubuyisela esimweni esifanele izindawo zomphakathi ezisenkabeni yeDolobha ngemikhankaso ebanjwa masonto onke, ehlanganisa iminyango eyahlukene. Le mikhankaso iqondene nokususwa kwezakhiwo ezingekho emthethweni, ukulahlwa kukadoti ngokungemthetho kanye nokusetshenziswa kwezindawo ezivulekile ngendlela engavumelekile.
Umkhankaso wakamuva ububanjwe kusukela ngomhlaka-19 kuya ku-21 Agasti eKing Dinuzulu Park. Ithimba elihlanganisa iminyango eyahlukene lisuse izakhiwo ezingekho emthethweni, laqoqa udoti obusunenqwaba, lathena izihlahla ukuze kuthuthukiswe ukubonakala nokuphepha, laphinde lafafaza indawo ngemithi yokubulala izinambuzane.
Ngemuva kokukhathazeka ngokuphepha okuvezwe izakhamuzi namabhizinisi, leli paki selilungisiwe futhi selibuyiselwe ekusetshenzisweni ngumphakathi.
Lo mkhankaso ulandela omunye owabanjwa kusukela ngomhlaka-12 kuya ku-14 Agasti endaweni yaseThe Workshop. Kule ndawo amathimba alwisane nokulahlwa kukadoti ngokungemthetho, avula futhi ageza imisele yamanzi, athena izihlahla aphinde ashanele imigwaqo ezungezile.
Le mizamo ikhombisa ukuzibophezela kweDolobha ekuqhubekeni nokunakekela lezi zindawo masonto onke, kunokuba kwenziwe imikhankaso yokuhlanza yesikhashana kuphela.
UMqondisi weSupply Side and Area Based Operations, uMnu Linda Mbonambi, uthe le mikhankaso ibhekana nenkinga ephindaphindayo enkabeni yedolobha.
“Izindawo ezivulekile ezinganakekelwa ziyagcina sezihlaselwa futhi zisetshenziswa ngokungemthetho. Ukuphazamiseka okuhambisana nalokho kugcina sekuthinta namabhizinisi aseduze, kwezinye izikhathi aze angakwazi nokuqhubeka nokuhweba. Ukubuyiselwa kwalezi zindawo esimweni esifanele akuphathelene nenhlanzeko nokuphepha kuphela, kodwa kuphinde kuvikele imisebenzi yezomnotho futhi kubuyise ukuzethemba kosomabhizinisi,” kusho uMbonambi.
UMbonambi ugcizelele ukuthi iDolobha ngeke livume ukuthi izindawo zomphakathi zisetshenziswe ngendlela engafanele, elimaza umphakathi.
“Sizibophezele ekubuyiseleni lezi zindawo ekusetshenzisweni ngendlela efanele. Lokhu kuyingxenye yenhloso ebanzi yokuqinisekisa ukuthi enkabeni yedolobha kubuya isiko lokulondoloza nokunakekela impahla, kuphinde kuhehe abatshalimali,” esho.
IDolobha lizimisele ukuqhubeka nokusebenzisana nabasebenzisi bezindawo ezahlukene kanye nabanikazi bezakhiwo ukuze kuqondaniswe izinhlelo zokuphepha, ukuhlanzeka nokunakekelwa kwengqalasizinda. Lokhu kuzosiza ekuvikeleni ukubaluleka kwezakhiwo nasekunqandeni ukuwohloka kwedolobha.
Le mikhankaso izoqhubeka masonto onke futhi izonwetshwa iye nakwezinye izindawo zomphakathi enkabeni yedolobha, ngenhloso yokwakha indawo ehlanzekile, ephephile, ekulungele ukuhlala nokusebenzela kuyo.
