Onobuhle abasafufusa abangu-25 bathole ukuqeqeshwa okujulile eThekwini kuleli
SHEILA MHLONGO
Onobuhle abasafufusa abangu-25 bathole ukuqeqeshwa okujulile eThekwini kuleli ngoLwesithathu lomhlaka 19 Agasti , njengoba uMasipala weTheku ulungiselela ukugubha iminyaka eyi-15 yomcimbi wawo omkhulukazi wezemfashini, iDurban Fashion Fair (DFF). Lo mcimbi uzoba seDurban Exhibition Centre kusukela mhla ziyi-16 kuya kumhla ziyi-18 Septhemba 2026.
Uhlelo lokuqeqesha onobuhle luqale mhla ziyi-15 Agasti eGooderson Tropicana Hotel, eThekwini, kanti luzoqhubeka kuze kube yilapho beqala ngokusemthethweni ukukhombisa emsamo emcimbini wokugubha leli qophelo elibalulekile.
Abahlanganyeli, okuhlanganisa abesifazane nabesilisa abahlukene, bahlonzwa futhi bakhethwa emikhankasweni ye-2026 Regional DFF Model Search ebibanjelwe ezindaweni ezahlukene ngaphansi kukaMasipala weTheku ekuqaleni kwalo nyaka. Lo mkhankaso wokuthungatha onobuhle uphothulwe ngoNhlangulana.
Uhlelo lubandakanya ukuqeqeshwa ngendlela yokuhamba e-Stage, ukuziphatha okufanele konobuhle, ukuzethemba, ukuxhumana nabezindaba, ukumaketha ezinkundleni zokuxhumana, ukuzakhela isithunzi kanye nokulungela ukusebenza ngokusezingeni embonini. Lokhu kuzohlomisa abasafufusa ngamakhono abangawasebenzisa ukwakha imisebenzi esimeme emkhakheni wezemfashini.
Onobuhle abangama-25 bazoqala ngokusemthethweni ukukhombisa e-Stage emcimbini we-DFF weminyaka eyi-15, ozoba ngaphansi kwesiqubulo esithi, “Where Legacy Lives.” Bazokhangisa ngemikhiqizo yabasiki bengqephu abasafufusa nasebezakhele igama.
Lo mbukiso uzobanikeza ithuba elibalulekile lokubonwa yizethameli, ochwepheshe bemboni kanye namakhasimende angase afune ukusebenza nabo, njengoba beqala ukwakha imisebenzi yabo yokuba ngonobuhle.
USihlalo weKomidi lokuThuthukiswa koMnotho nokuHlela kuMasipala weTheku, uKhansela Thembo Ntuli, uthe lolu hlelo lukhombisa ukuzibophezela kweDolobha ekuthuthukiseni ithalente nasekuvuleni amathuba ezomnotho kuyo yonke imikhakha exhumene nezemfashini.
“I-DFF ivula indlela esuka ekuhlonzweni kwethalente iye ekuthuthukisweni kobungcweti nasekutholeni amathuba emakethe. Ukutshala kwethu imali kulaba nobuhle abasebasha kweseka ukuzethemba, amabhizinisi kanye nokufinyelela emathubeni atholakala emkhakheni wezemfashini. Njengoba sigubha iminyaka eyi-15 ye-DFF, siyaziqhenya ngokwethula isizukulwane esisha sethalente, siphinde sisivulele amathuba okwakha imisebenzi esimeme,” kusho uNtuli.
Umthelela walolu hlelo usuyabonakala kuCynthia Gumede, owake wahlomula ohlelweni lwe-DFF Model Search. UGumede wahlonzwa futhi waqeqeshwa njengengxenye yeqembu langowezi-2025. Njengamanje useVietnam, lapho ebambe iqhaza khona kwiVietnam Beauty Fashion Fest.
Leli thuba lokuziveza ezingeni lomhlaba lilandele ukubonakala kwakhe embukisweni we-DFF wangonyaka odlule, lapho ochwepheshe bemboni yamazwe ngamazwe bahlonza khona ithalente lakhe.
“I-DFF yakuguqula ukuzethemba kwami futhi yanginikeza ithuba lokubonakala embonini engangilidinga. Selokhu ngabamba iqhaza kulolu hlelo, sengisebenze nezinkampani ezaziwayo ezifana neTropika, ngabambisana nabasiki bengqephu futhi ngavela emibukisweni emikhulu yezemfashini. Ngiyambonga uMasipala weTheku ngokutshala imali entsheni enethalente nangokusungula izinkundla eziqhubeka nokusivulela iminyango, okubandakanya namathuba aphesheya kwezilwandle,” kusho uGumede.
Amalungu omphakathi nabezindaba abafisa ukuhambela i-DFF yeminyaka eyi-15, noma ukulandela uhambo nenqubekela phambili yonobuhle balo nyaka, bayakhuthazwa ukuba balandele ikhasi elithi @Durban Fashion Fair kuzo zonke izinkundla zokuxhumana.
Qhubekani nilandele ukuze nithole izindaba zakamuva, okuqukethwe okwenzeka ngemuva kwezinhlelo, imininingwane ngonobuhle abaqeqeshwayo, izimemezelo zombukiso kanye nosuku amathikithi azoqala ngalo ukudayiswa.
Landela, ubambe iqhaza futhi ube yingxenye yohambo oluya kwi-DFF yeminyaka eyi-15, ngaphansi kwesiqubulo esithi “Where Legacy Lives.”
