ESITHOMBENI I-Operation Good Hope ibe nomthelela omkhulu ezindaweni zaseMobeni Heights, eHavenside naseSilverglen. Ezinsukwini ezinhlanu zomsebenzi omkhulu, uPhiko lwe-Supply Side Area-Based Management lukaMasipala waseThekwini, iminyango kaMasipala kanye namavolontiya omphakathi azinikele basebenze ngokubambisana ukubhekana nokulahlwa kukadoti ngokungemthetho, ukulungisa amalambu asemigwaqweni abengasebenzi, ukuvala izindawo ezivuza amanzi kanye nokuvuselela ingqalasizinda yemigwaqo. Lokhu kusize ekwakheni indawo ehlanzekile nephephile.
SHEILA MHLONGO
UMasipala waseThekwini wethule umkhankaso oqinile futhi obandakanya imisebenzi eyahlukene eWodini 69, eChatsworth. Lo mkhankaso ugxile ekuthuthukisweni kwemvelo, ekulungisweni kwengqalasizinda nasekuqinisweni kokulethwa kwezidingo emphakathini.
Lo mkhankaso obuthathe isonto lonke ububandakanya izindawo zaseBayview, eMobeni Heights, eHavenside naseSilverglen. Ube nemiphumela esheshayo nebonakalayo ngokuhlanza izindawo ezivulekile, ukulungisa ingqalasizinda ebalulekile kanye nokubuyisela ukuzigqaja nesithunzi emiphakathini.
Lo mkhankaso omkhulu, oqale mhla zingama-27 waphela zingama-31 kuNtulikazi 2026, ubuhlanganise iminyango eyahlukene kaMasipala kanye nababambiqhaza. Inhloso bekuwukubhekana nezidingo zomphakathi ngokuhlola ukuthi amabhizinisi ayayilandela yini imithetho, ukususa izindawo okulahlwa kuzo udoti ngokungemthetho, ukulungisa ingqalasizinda, ukuhlanza imvelo kanye nokuxhumana ngqo nomphakathi.
Izakhamuzi ziphinde zafundiswa ngezindlela ezifanele zokuphathwa kukadoti futhi zaziswa ngezinsiza zikaMasipala ezitholakala emakhaya nasemabhizinisini.
Imisebenzi ebalulekile yokulethwa kwezidingo eyenziwe phakathi nalo mkhankaso ibihlanganisa ukususwa kwezindawo okulahlwa kuzo udoti ngokungemthetho kanye nodoti obunqwabelene. Kuphinde kwahlanzwa imigwaqo, izindawo zomphakathi ezivulekile kanye nezakhiwo ezisetshenziswa umphakathi. Kwalungiswa namalambu asemigwaqweni ukuze kube nokukhanya okwanele futhi kuthuthukiswe ukuphepha komphakathi.
Lo mkhankaso uphinde wabhekana nokuvuza kwamanzi ukuze kuncishiswe ukulahleka kwawo futhi kwenziwe ngcono ukwethenjwa kwezinsiza zamanzi. Ingqalasizinda yemigwaqo ezindaweni ebeziqokiwe nayo yalungiswa futhi yanakekelwa.
Ngaphezu kwalokho, kwenziwe imikhankaso yokuqwashisa umphakathi ukuze kugqugquzelwe ukulahlwa kukadoti ngendlela efanele. Izidingo zomphakathi ezisadinga ukunakwa uMasipala nazo zahlonzwa zadluliselwa eminyangweni efanele ukuze kuthathwe izinyathelo.
Lo mkhankaso uholele ekuthuthukeni okukhulu kwenhlanzeko, ukuphepha kanye nokubukeka kwezindawo ebeziqokiwe kuyo yonke iWodi 69.
Izindawo ebezinganakiwe phambilini zivuselelwe, kwaqedwa imisebenzi ebalulekile yokuthuthukisa ingqalasizinda, kanti izakhamuzi zazibonela ngamehlo inqubekelaphambili yangempela ezindaweni ezihlala kuzo.
Lo mkhankaso uphinde waveza amandla okulethwa kwezidingo okuhlelekile kanye nobambiswano oluqinile phakathi kukahulumeni, amabhizinisi, abaholi bomphakathi nezakhamuzi ekuthuthukiseni izindawo.
Ngaphandle kwemiphumela esheshayo, lo mkhankaso uqinise ukubamba iqhaza komphakathi futhi wandisa ukuqwashisa ngezinhlelo zokweseka zikaMasipala nezikahulumeni ezitholakala kuzakhamuzi nakumabhizinisi.
Ephawula ngempumelelo yalo mkhankaso, iMenenja Enkulu yoPhiko lwe-Supply Side Area-Based Management, u-Eurakha Singh, uthe:
“I-Operation Good Hope ikhombisile ukuthi yini engafezwa lapho iminyango kaMasipala, abaholi bomphakathi, amabhizinisi nezakhamuzi besebenzisana ngenhloso eyodwa. Lo mkhankaso awugcinanga nje ngokuthuthukisa ukulethwa kwezidingo kanye nendawo yokuhlala, kodwa uphinde wabuyisela ukuzigqaja nokuzethemba emphakathini. Ufake isisekelo esiqinile sentuthuko yesikhathi esizayo, ukubambisana okuqhubekayo kanye nokulethwa kwezidingo okusimeme eWodini 69.”
I-Operation Good Hope ibhekane ngempumelelo nezidingo eziphuthumayo zokulethwa kwezidingo, yaphinde yakha inkundla yokuqhubeka nokuxhumana nomphakathi kanye nokuqapha izidingo zawo kusenesikhathi.
Lo mkhankaso uyisibonelo sokubusa ngokubambisana futhi ufaka isandla ekuthuthukisweni kwesikhathi eside, ekuqiniseni ukumelana nezinselelo kanye nenhlalakahle yeWodi 69 nezakhamuzi zayo.
