USolwazi Ncoza Dlova waseNyuvesi yaKwaZulu-Natal (UKZN)
SHEILA MHLONGO
- USolwazi Ncoza Dlova waseNyuvesi yaKwaZulu-Natal (UKZN) uqokwe njengoSihlalo wethimba Eliqondene Namasu Lokunqanda Ukukhanyiswa Kwesikhumba le-International League of Dermatological Societies (ILDS).
- Ochwepheshe bamazwe ngamazwe bayahlangana ukuze babhekane nezingozi ezikhulayo empilweni yomphakathi ezidalwa yimikhuba yokukhanyisa isikhumba emhlabeni wonke.
- Umkhankaso omusha we-ILDS uzoqwashisa ngezingozi zemikhiqizo yokukhanyisa isikhumba engalawulwa, uphinde ukhuthaze izindlela zokungenelela ezisekelwe ebufakazini besayensi.
INhloko yoMnyango Wezifo Zesikhumba eNyuvesi yaKwaZulu-Natal (UKZN), uSolwazi Ncoza Dlova, iqokwe njengoSihlalo weQembu Eliqondene Namasu Lokunqanda Ukukhanyiswa Kwesikhumba elisanda kusungulwa yi-International League of Dermatological Societies (ILDS).
Lolu wuhlelo lomhlaba wonke okuhloswe ngalo ukulwa nezingozi ezikhulayo empilweni ezihambisana nemikhuba eyingozi yokukhanyisa isikhumba.
UDlova uthe umkhuba wokukhanyisa isikhumba ukhula ngesivinini esikhulu emhlabeni wonke, kangangokuba manje usuwumthwalo omkhulu empilweni yomphakathi, nakuba ungakaqashelwa ngokwanele.
Wengeze ngokuthi leli ithimba Lizosebenzisana nemiphakathi ukuqwashisa ngokubaluleka kwempilo yesikhumba enhlalakahleni yomuntu jikelele. Lizophinde lidlulise umyalezo ocacile wokuthi isikhumba esinempilo sitholakala kuyo yonke imibala.
“Ithimba lethu lisebenzisa ulwazi oluvela emikhakheni ehlukahlukene ukuze libhekane nale nkinga eyinkimbinkimbi neyinselele. Lizothatha izinyathelo ezihlelekile, ezisekelwe ebufakazini, futhi lilwele ukuba kuthathwe izinqumo ezifanele.
“Siyakuqonda ukuthi izinkinga zokuba namabala amnyama noma ukushintsha kombala wesikhumba ziyabakhathaza kakhulu abantu abaningi abanesikhumba esimnyama. Lezi zinkinga zingaphazamisa izinga lempilo yabo kanye nokuzethemba kwabo.
“Umkhankaso wethu ukhuthaza ukwelashwa okuphephile nokusekelwe ebufakazini, kanye nokuthathwa kwezinqumo ezinolwazi. Ngesikhathi esifanayo, uqwashisa ngezingozi zemikhiqizo yokukhanyisa isikhumba engalawulwa futhi eyingozi,” kusho uDlova.
Ukukhanyiswa kwesikhumba, okugqugquzelwa yingcindezi yezenhlalo namasiko athanda isikhumba esikhanyayo, sekuyinkinga enkulu yezempilo yomphakathi ethinta izigidi zabantu e-Afrika, e-Asia, eMpumalanga Ephakathi, eCaribbean kanye nasemiphakathini yabantu abahlala ngaphandle kwamazwe abadabuka kuwo.
Ngokwesibonelo, eNigeria kulinganiselwa ukuthi u-75% wabesifazane usebenzisa njalo imikhiqizo yokukhanyisa isikhumba. ESenegal isibalo simi ku-50%, kanti eNyakatho yeNdiya, u-60% wabantu ababambe iqhaza ocwaningweni ubike ukuthi usebenzisa imikhiqizo yokukhanyisa isikhumba.
Ithimba le-ILDS likhathazeke kakhulu ngobufakazi obukhombisa ukuthi imikhiqizo yokukhanyisa isikhumba iya ngokuya isetshenziswa yintsha, kanti kwezinye izindawo isetshenziswa ngisho nasezinganeni ezisencane kakhulu. Imibiko yakamuva iphinde iveze ukuthi lo mkhuba usuyanda nakwabesilisa.
Imikhiqizo yokukhanyisa isikhumba ayilawulwa ngendlela efanele futhi ivamise ukudayiswa ngaphandle kokuqondisa kochwepheshe bezempilo. Lokhu kudala izingozi ezinkulu empilweni yomphakathi, ezihlanganisa ukulimala kwesikhumba, izinkinga ezidalwa ukusetshenziswa kabi kwama-steroid, ukuchayeka ezithakweni ezinobuthi kanye nokuxhunyaniswa nezifo ezibucayi, okubalwa nomdlavuza wesikhumba.
Ithimba le-ILDS lizokwandisa ukuqwashisa futhi lifundise abathengi ngezingozi le mikhiqizo engazidalela impilo yabo…
Incazelo yesithombe: USolwazi Ncoza Dlova efundisa abafundi bezokwelapha abenza unyaka wokugcina eLabhorethri Yamakhono Ezokwelapha.
Esinye isithombe: USolwazi Ncoza Dlova.
